Zań eshkimniń shen-shekpenine qaramaıdy
ASTANA. QazAqparat - Almaty garnızony áskerı sotynyń uıymdastyrýymen alqaly jıyn bolǵan edi. Onda «QR Qarýly kúshterindegi sybaılas jemqorlyqpen kúrestegi QR Áskerı sottarynyń róli» degen taqyryp boıynsha ótken dóńgelek ústel uıymdastyryldy.
Jıynǵa Almaty garnızony áskerı sotynyń tóraǵasy Muhametjan Paqyrdinov jetekshilik etip, qarýly kúshterdegi sybaılas jemqorlyq faktilerin ashyq aıtyp, synǵa aldy. Shendilerdi shetinen turǵyzyp, suraqtyń astyna alǵan tóraǵa, eń áýeli, jemqorlyqpen kúresti kúsheıtý kerektigin qatań eskertti. Ol óz sózinde jeń ushynan jalǵasqan jemqorlyq derekteri elimizdiń ásker salasynda da kezdesetinin jasyrmady. «Respýblıkamyzdyń áskerı sottary kúndelikti jumys barysynda sybaılas jemqorlyq sıpatyndaǵy qylmystyq isterdi qaraıdy. Ásirese, laýazymy joǵary áskerı qyzmetkerlerdiń sybaılas jemqorlyq faktisimen isti bolýy qoǵam nazaryn aýdarýda. Mysaly, Asenov, Ilıasov, Býldeshov, Maıkeev syndy generaldardyń ústinen qozǵalǵan qylmystyq isterdi aty shýly qylmystyq oqıǵa deýge bolady. Árıne, bul maqtanarlyq is emes, kerisinshe, muny elimizdiń Qarýly kúshteriniń atyna túsken daq jáne elimizge tóngen qaýip dep baǵalaý kerek. Desek te, bul faktiler bizdiń sybaılas jemqorlyqpen kúreste eshkimniń shen-shekpenine, laýazymy men ataq-dárejesine qaramaı, laıyqty jazasyn beretinimizdi bildiredi», - dedi sot tóraǵasy.
Osy oraıda, Almaty garnızony áskerı sotynda ústimizdegi jyldyń toǵyz aıynda 12 tulǵa sybaılas jemqorlyq faktisi boıynsha sottalǵan. Al, ótken jyly osyndaı qylmys jasaǵan 8 áskerı jazaǵa tartylypty. Bul áskerıler arasyndaǵy sybaılas jemqorlyqtyń ótken jylǵa qaraǵanda artqandyǵyn baıqatady. Sot tóraǵasy M.Paqyrdinov: «Sybaılas jemqorlyq faktileri negizinen baqylaý qyzmetin júzege asyratyn áskerıler arasynda jıi oryn alady. Atap aıtsaq, Qazaqstan men Qyrǵyz Respýbıkasynyń shekarasynda ornalasqan Qordaı shekara qyzmeti №2038 áskerı bóliminiń ofıtserleri maıor Kerımbaev, kapıtan Ýlýhmanov pen Ibraevtardyń qyzmet babyn asyra paıdalanyp, sybaılas jemqorlyqpen aınalysqandary áshkere boldy. Olar áskerı sottyń úkimimen zań aldynda laıyqty jazalaryn aldy», - dep óz sózin naqty faktilermen rastap berdi.
Ras, temirdeı tártipti súıetin áskerılerdiń arasynda jemqorlyq indeti bar degenge sený qıyn. Tipti, bul saladaǵy sybaılas jemqorlyqtyń sıpaty da ózgeshe kórinetindeı. Ataýynan at úrketin quzyrly organ basshylarynyń qolyna kisen túsipti degendi estigende eleń etpeıtin jan joq shyǵar, sirá. Mysaly, QR Qorǵanys mınıstriniń orynbasary, general-maıor Maıkeevtiń asa iri kólemde para alyp ustalǵany jáne oǵan para usynǵan úsh birdeı kásipkerdiń de temir torǵa toǵytylǵanynan halyq habardar. Bas bostandyǵynan aıyrylyp, dúnıe-múlki tárkilengen Maıkeev memlekettik «Dańq», «Aıbyn» ordenderinen de qosa aıyrylǵany este. Osylaısha, burynǵy general-maıordyń temir torǵa toǵytylýy «zań aldynda han da, qara da teń» ekenin taǵy da bir dáleldep bergendeı.
