Zań buzýshylyqtardan keıin plastıkalyq hırýrgııa klınıkalary jappaı tekserilmek
ASTANA. KAZINFORM — Densaýlyq saqtaý mınıstrligi medıtsınalyq uıymdardyń qyzmetine memlekettik baqylaýdy kúsheıtý maqsatynda Qazaqstan Respýblıkasy Bas prokýratýrasymen kelisip, plastıkalyq hırýrgııa qyzmetin kórsetetin medıtsınalyq uıymdarǵa qosymsha jospardan tys tekserýler júrgizýdi josparlap otyr. Bul týraly vedomstvonyń baspasóz qyzmeti málim etti.
Keshendi tekserý barysynda zań buzýshylyqtar anyqtalǵan jaǵdaıda, Qazaqstan Respýblıkasynyń zańnamasyna sáıkes tıisti sharalar qabyldanady.
Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń aýmaqtyq departamentteri plastıkalyq hırýrgııa salasynda qyzmet kórsetetin medıtsınalyq uıymdarǵa 2021 jyldan búgingi kúnge deıin 92 jospardan tys tekserý júrgizdi.
Plastıkalyq hırýrgııa salasynda kórsetiletin medıtsınalyq kómektiń sapasy men qaýipsizdigine qatysty azamattardyń shaǵymdary men ótinishteriniń kóbeıýine baılanysty Tekserýlerdiń basym bóligi 2024 jyly boldy.
— Tekserý nátıjesinde lıtsenzııalyq talaptardyń, medıtsınalyq kómekti uıymdastyrý standarttarynyń jáne medıtsınalyq qujattamany júrgizý qaǵıdalarynyń buzylǵany anyqtaldy. Sondaı-aq keıbir medıtsınalyq uıymdardyń tıisti ruqsat qujattarynsyz qyzmet kórsetkeni belgili boldy, — delingen habarlamada.
Anyqtalǵan zań buzýshylyqtardy joıý úshin Komıtettiń aýmaqtyq departamentteri mindetti túrde oryndalýǵa tıis nusqamalar berdi. Budan bólek, ákimshilik quqyq buzýshylyqtar boıynsha 24 hattama toltyrylyp, jalpy somasy 4,8 mln teńge kóleminde ákimshilik aıyppul salyndy.
— Baqylaý sharalary aıasynda Komıtettiń aýmaqtyq departamentteri plastıkalyq operatsııalardyń sońy adam ólimine ákelgen jekelegen jaǵdaılar boıynsha da jospardan tys tekserýler júrgizdi. Mundaı oqıǵalardyń eń kóbi Almaty jáne Astana qalalarynda, sondaı-aq Mańǵystaý oblysynda tirkeldi. Tekserý qorytyndysy boıynsha materıaldar zańnamaǵa sáıkes tıisti protsestik sheshim qabyldaý úshin quqyq qorǵaý organdaryna joldandy, — dep habarlady mınıstrlikten.
Qazaqstan Respýblıkasy Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti medıtsınalyq kómektiń sapasy men qaýipsizdigin qamtamasyz etý, onyń zań talaptaryna saı kórsetilýin baqylaý jáne patsıentterdiń quqyqtaryn qorǵaý baǵytyndaǵy memlekettik baqylaý jumystaryn jalǵastyrady.
Aıta keteıik, plastıkalyq hırýrgııa klınıkalaryna lıtsenzııa berý tártibi ózgerýi múmkin.
