Zań buzýshylyq bir uıym qyzmetine ǵana qatysty – Týrızm mınıstri JAP aýdıty jaıynda
ASTANA. KAZINFORM — Joǵary aýdıtorlyq palata anyqtaǵan zań buzýshylyqtar negizinen Týrızm jáne sport mınıstrligine baǵynyshty bir ǵana uıymnyń qyzmetine qatysty. Bul týraly Týrızm jáne sport mınıstrligi Sport jáne dene shynyqtyrý isteri komıtetiniń baspasóz hatshysy Meıramǵazy Saparǵalıev aıtty.
— Týrızm jáne sport mınıstrligi Joǵary aýdıtorlyq palata júrgizgen aýdıt jumys tártibinde jáne tekserý jumystary tolyq ózara is-qımyl jaǵdaıynda ótkenin habarlaıdy. Aýdıt barysynda barlyq qajetti materıaldar usynylyp, anyqtalǵan eskertýlerdiń bir bóligi tekserý barysynda joıyldy. Aýdıt 2021 jylǵy qyrkúıekten 2024 jylǵy jeltoqsanǵa deıingi júrgizildi. Jarııalanǵan materıaldarda keltirilgen faktiler mınıstrlikke málim. Olardyń basym bóligi buǵan deıin jumys barysynda eskerilgen jáne qazirgi tańda júrgizilip jatqan reformalar aıasynda sheshimin taýyp jatyr, — dedi ol.
Onyń atap ótýinshe, qarjylandyrýdaǵy buǵan deıingi aıqyndalǵan máseleler aýdıttiń negizgi baǵyttarynyń biri boldy. 2025 jyldyń maýsym aıynan bastap sporttyń basym túrlerin aıqyndaýǵa arnalǵan naqty tetikterdi kózdeıtin «Dene shynyqtyrý jáne sport týraly» Zańnyń jańa redaktsııasy kúshine endi. Sonymen qatar kásibı sport klýbtaryn bıýdjetten qarjylandyrýǵa lımıtter belgilenip, qarajat bólýdiń jańa krıterııleri engizildi.
— Joǵary aýdıtorlyq palata kórsetken máselelerdiń basym bóligi mınıstrlikke qarasty vedomstvolyq baǵynysty bir ǵana uıymnyń qyzmetine qatysty. Atalǵan derekter boıynsha tergeý 2023 jyldan beri jalǵasyp keledi. Mınıstrlik qazirgi ýaqytta tıisti organdarmen birlese jumys istep jatyr. Tergeý qorytyndylary boıynsha tıisti quqyqtyq baǵa beriledi. Esepte kórsetilgen soma salalyq shyǵyndardyń tıimdiligin josparlaý, baqylaý jáne tıimdiligin baǵalaý boıynsha júıeli sıpattaǵy máselelerge qatysty. 2025 jylǵy 16 maýsymda qabyldanǵan «Dene shynyqtyrý jáne sport týraly» zańǵa engizilgen ózgerister osyndaı táýekelderdi azaıtýǵa baǵyttalǵan, — dedi vedomstvo baspasóz hatshysy.
Komıtet ókili Joǵary aýdıtorlyq palatamen birlesken is-sharalar jospary bekitilgenin aıtady. Bul jospar basqarýshylyq jáne normatıvtik sharalardy qamtıdy.
— Mınıstrlik syrtqy aýdıtti ashyqtyq pen tıimdilikti arttyrýdyń mańyzdy quraly dep sanaıdy. Aýdıt barysynda anyqtalǵan eskertýlerdi joıý boıynsha jumystar jalǵasady. Josparlanǵan reformalardyń júıeli túrde júzege asyrylýy turaqty jáne oń nátıjelerge qol jetkizýge múmkindik beredi degen senimdemiz, — Meıramǵazy Saparǵalıev.
Buǵan deıin Joǵary aýdıtorlyq palata sportshylardy tárbıeleý men daıarlaýǵa bólingen bıýdjet qarajatynyń paıdalanylý tıimdiligine qatysty memlekettik aýdıt júrgizip, onyń nátıjelerin jarııalaǵan bolatyn.
Aýdıt qorytyndysy boıynsha jalpy somasy shamamen 17 mlrd teńge bolatyn buzýshylyqtar anyqtalǵan.