Zań boıynsha qazaqstandyqtar shetel azamattaryna donor bola ala ma
ASTANA. KAZINFORM — Elimizdiń zańnamasyna sáıkes, qazaqstandyq azamattardyń donorlyq aǵzalary men tinderi shetel azamattaryna transplantatsııalanbaıdy.
Bul týraly QR Densaýlyq saqtaý mınıstrligi Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy dırektorynyń orynbasary Nazgúl Jylgeldına málimdedi.
Onyń aıtýynsha, qoldanystaǵy zańnamada qazaqstandyqtardyń aǵzalary men tinderin shetel azamattaryna transplantatsııalaýǵa jol berilmeıdi.
— Zańnamaǵa sáıkes, Qazaqstan azamaty shetel azamatyna tiri kezinde de, qaıtys bolǵannan keıin de donor bola almaıdy, ıaǵnı qazaqstandyqtardyń donorlyq aǵzalary men tinderi shetel azamattaryna transplantatsııalanbaıdy, — dedi Nazgúl Jylgeldına.
Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
