Zań aıasynda onlaın alaıaqtyqpen kúresý boıynsha qajetti sharalar qabyldanady - Darhan Qydyráli

ASTANA. QazAqparat - Aqparat jáne qoǵamdyq damý mınıstri búgin Memleket basshysy qol qoıǵan «Onlaın-platfmormalar jáne onlaın-jarnama» týraly zańǵa qatysty pikir bildirdi, dep habarlaıdy QazAqparat.

«Barshaǵa belgili, áleýmettik jeliler búginde negizgi aqparat kózi men qoǵamdyq-saıası baǵytty qalyptastyratyn platformaǵa aınaldy. «Qoǵam tynysynyń barometri» atanǵan mass-medıa salasy qarqyndy damyǵan tusta aqparattyq tehnologııalar áserimen álem kúrt ózgeriske ushyrady, kommýnıkatsııanyń landshafty da tereń transformatsııaǵa tústi. Máselen, kúni keshe ǵana Reuters Institute jarııalaǵan bıylǵy «Dıjıtal jańalyqtar esebi» boıynsha, álemde áleýmettik jeli arqyly jańalyqpen tanysý 30 paıyzǵa ulǵaıǵan», - dep jazdy mınıstr jelidegi paraqshasyna.

Ol osyǵan baılanysty Prezıdent 2022 jylǵy 16 naýryzdaǵy Joldaýynda medıa salanyń damý úrdisin eskere otyryp, BAQ týraly zańdy qaıta qaraýdy tapsyrǵanyn eske salady.

«Bul oraıda medıa qaýymdastyq jáne qoǵamnyń pikirine qulaq túrip, álemdik tendentsııalardy muqııat zerdelep, mass medıa týraly zańnama men onlaın platformalarǵa arnalǵan erejelerdi bólek qarastyrýdy jón sanadyq.

Zańnyń qabyldanýy Qazaqstan Respýblıkasyndaǵy onlaın-platformalardyń qyzmeti úshin quqyqtyq negizder qalyptastyrady, onlaın platformalar jáne onlaın jarnama salasyndaǵy retteýdiń normatıvtik negizin konseptýaldyq turǵydan ózektendirýge múmkindik beredi. Oǵan qosa, Eýropalyq odaq qabyldaǵan Digital Services Act nemese tsıfrlyq qyzmetter týraly zańnyń balamasy ispetti bul zań álemdik áleýmettik jelilerdiń ınterfeısin qazaqshalaý, ınflıýenserlerdiń jarnamasyn tańbalaý, zańsyz kontentti neǵurlym tıimdi moderatsııalaý máselelerin de retteıdi», - degen Darhan Qydyráli.

Mınıstrdiń málimetinshe, Zań aıasynda kóleńkeli ekonomıka úrdisin azaıtý jáne onlaın alaıaqtyqpen kúresý boıynsha qajetti sharalar qabyldanady. Basqasha aıtqanda, oflaın ómirdegi jaýapkershilik onlaın álemde mindetteledi.

«Jalpy qabyldanǵan zań azamattardyń quqyqtary men bostandyqtaryn tolyqqandy iske asyrý úshin onlaın platformalarmen tıimdi yntymaqtastyq pen ózara is-qımyl ornatýǵa múmkindik beredi. Bul rette qazirdiń ózinde álemge áıgili áleýmettik jeliler men onlaın platformalar áriptestik ornatýǵa yqylasty ekendikterin tanytyp, keıbiri ókilderin taǵaıyndady», - deıdi vedomstvo basshysy.

Aıta keteıik, búgin Prezıdent Onlaın platformalar jáne onlaın jarnama týraly zańǵa qol qoıǵan bolatyn.