Zań aıasynda qatań sharalar qabyldanady – Bilim mınıstri anasy qýyp shyqqan 8 jasar qyz týraly

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov anasy kıimsiz qýyp shyqqan 8 jasar qyz oqıǵasyna pikir bildirdi, dep habarlaıdy QazAqparat tilshisi.

«Biz bul oqıǵany estidik, onda arnaıy top jiberildi. Qamqorlyq organdary men ıývenaldy polıtsııa sonda baryp, tıisti jumystardy júrgizýde. Árıne, bul oqıǵaǵa sóz qurap aıtýdyń ózi qıyn. Qyz bala dalada kıimsiz otyr, aınala toly qar. Shyn máninde, bul qyzdyń jaǵdaıy aqylǵa qonbaıdy... Bireýler bala súıýdi armandap júrse, keı jerde, ókinishke oraı, osyndaı sumdyq jaǵdaılar bolady», - dep jaýap berdi Bilim mınıstri Ortalyq kommýnıkatsııalar qyzmetinde tilshi suraǵyna.

Mınıstrdiń aıtýynsha, memleket bul jaǵdaıda óte jyldam áreket etýi kerek.

«Sondyqtan qamqorlyq organdary habardy estsimen oqıǵa ornyna shyǵyp, tıisti jumystardy júrgizip jatyr. Ázirge bir nárse týraly aıtýǵa erte, ne bolǵanyn, jaǵdaı qandaı bolǵanyn, sebepterin anyqtaý kerek. Árıne, bul oqıǵaǵa eshqandaı sebepti aıtý múmkin emes. Shyndyqqa qanshalyqty saı keletinin, barlyǵyn kóremiz. Zań aıasynda eń qatań sharalar qabyldanady», - dedi Ashat Aımaǵambetov.

Aıta keetıik, elordada 8 jastaǵy qyzyn qystyń sýyǵynda dalaǵa qýyp jibergen 35 jastaǵy áıeldiń isi qaralyp jatyr. Polıtsııa qyzmetkerleri osy oqıǵaǵa qatysty 35 jastaǵy áıelden jaýap alǵan. Ol osyndaı amalmen kórshilerdiń kir qystyrǵyshyn ruqsatsyz alyp, oınaǵan balalaryn jazalaǵanyn aıtqan.