Zań aldynda bári birdeı – ІІM basshysy rezonanstyq jaǵdaılarǵa qatysty túsinikteme berdi
ASTANA. KAZINFORM – QR Prezıdenti janyndaǵy Ortalyq kommýnıkatsııalar qyzmeti iske qosqan podkastta kóterilgen máselelerdiń biri ІІM ishindegi sybaılas jemqorlyqqa qarsy kúres boldy. ІІM basshysy Erjan Sádenov jaqynda Qostanaıda tártip buzǵan júrgizýshi men polıtseıler arasynda bolǵan oqıǵaǵa qatysty túsinikteme berdi. Júrgizýshi ІІM Akademııasynyń tyńdaýshysy bolyp shyqqan.

– Esterińizge sala keteıin, polıtsııanyń mindeti – qylmystyń aldyn alý, ashý, tergeý, ıaǵnı qoǵamdaǵy zańdylyqty saqtaý. Qylmys pen polıtsııa syıyspaıtyn uǵymdar. Qostanaıdaǵy jaǵdaıǵa toqtalsaq, bul tyńdaýshynyń, ıaǵnı tártip buzǵan júrgizýshiniń bolashaǵy bar edi. Akademııada magıstratýrada oqyp júrse, osyndaı áreketke barmasa, onda óser edi. Mundaı jaǵdaılarda biz nóldik tózimdilik tanytamyz. Tıisinshe, ol ishki ister organdarynan shyǵaryldy. Tabandylyq tanytpaǵan qyzmetkerler de jazalandy. Biz zańdy buzǵan polıtsııa qyzmetkerlerine nóldik tózimdilikpen qaraımyz. Bul jumys jalǵasady, – dedi ol.
Onyń aıtýynsha, vedomstvo ishinde sybaılas jemqorlyqpen kúresý úshin birqatar aldyn alý sharasy qabyldanyp, tálimgerlik ınstıtýty belsendi qoldanylady.
– Byltyr Kadrlyq áleýetti arttyrý jylyn jarııalaǵanymyzdy aıta ketken jón. ıAǵnı, bizde kim qyzmet etetinin, mundaı jaǵdaılardyń qalaı aldyn alý kerek ekenin anyqtadyq. Integrity check degen uǵymdy engizdik, ıaǵnı jyl saıyn adaldyqqa tekseremiz. Sybaılas jemqorlyqqa qarsy qyzmetpen birlesken is-sharalar jospary bar, – dep atap ótti Erjan Sádenov.
Onyń aıtýynsha, bir ǵana jaǵymsyz jaǵdaı ózge tártip saqshylarynyń myńdaǵan erligin «joq qylady». Mınıstrdiń aıtýynsha, qoǵamdyq jazǵyrý zań men tártipti buzýdyń aldyn alýǵa kómektesedi. Áldeqaıda aýyr quqyq buzýshylyqtyń alǵysharttary bolýy yqtımal árbir jaǵdaı ofıtserler jınalysynda qaralady.
– Іsine uqypsyz qyzmetkerler bolady, satqyndar da bolady. Bul turǵydan da jumys júrgiziledi. Zań aldynda bári birdeı. Bul normalar bizge de qatysty. Tártipti buzsań, ol úshin jaýap berýiń kerek. Sondyqtan qaıtalap aıtamyn, quqyq buzýshylyq pen polıtsııa – bul syıyspaıtyn uǵymdar, – dep túıindedi ІІM basshysy.
Buǵan deıin adam saýdasyna qatysty 40 qylmys anyqtalǵanyn jazǵan bolatynbyz.