Zamanback, 46 tún: Evgenıı Kochetov kórermen narazylyǵyna tap bolǵan fılmderdi atady

ASTANA. KAZINFORM — Mádenıet jáne aqparat mınıstriniń orynbasary Evgenıı Kochetov Májilistiń jalpy otyrysynda qazaqstandyq fılmder byltyr qansha kassa jınaǵanyn aıtty. 

— 2024 jyly qazaqstandyq fılmder kınoteatrlarda shamamen 20 mlrd teńge kassa jınady. Bul el tarıhyndaǵy eń joǵary kórsetkish. Eń mańyzdysy, qazaqstandyq kórermenniń tańdaýy otandyq týyndylarǵa oıysyp jatyr. Byltyr kórermen sany boıynsha top-20 fılmniń 70 paıyzy qazaqstandyq fılm boldy.

Prezıdentti ulttyq quryltaıda bergen tapsyrmasy boıynsha e-Kıno aqparat júıesi ázirlenip, pılottyq negizde iske qosyldy. Qazir onda 63 kınoteatr qosylǵan. Kelesi jyly barlyq kınoteatrdy qosamyz, — dedi ol depýtat Janarbek Áshimjannyń suraǵyna bergen jaýabynda.

Sondaı-aq, ol kórermen shaǵymyna tap bolǵan fılmderdiń keıbireýin atady.

— Keıbir fılmderde qoǵamda túrli pikir týdyratyn mazmun bar. Mysaly, 2024 jyly shyqqan Zamanback fılmine kórermenderden orynsyz sózder týraly shaǵym tústi. Al bıyl shyqqan «46 tún» týyndysynan zorlyq-zombylyqty nasıhattaý faktisi tirkeldi. Árıne, bul faktiler boıynsha mınıstrlik prokat kýálikterin toqtatty. Osyndaı faktilerdiń tolyq tizimin jazbasha bere alamyn, — dedi Evgenıı Kochetov.

Mádenıet jáne aqparat mınıstrliginiń málimeti boıynsha, jyl basynan beri elimizde 60 otandyq fılm (onyń ishinde 10 ulttyq fılm), 200-den astam sheteldik fılm kınoprokatqa shyqqan.