Zamanaýı jabdyq pen zerhanalar: Almatyda úsh emhana kúrdeli jóndeýden ótti
ALMATY. KAZINFORM – Almatyda kúrdeli jóndeý jumystarynan keıin úsh medıtsınalyq mekemege iske qosyldy.
Almaty qalasy Qoǵamdyq densaýlyq saqtaý basqarmasynyń málimetinshe, byltyr №3 qalalyq emhanada, №18 qalalyq emhanasynyń fılıaly jáne jedel medıtsınalyq járdem qyzmetiniń №8 qosalqy stantsııasynda kúrdeli jóndeý jumystary bastalǵan. Qazirgi ýaqytta barlyq nysan boıynsha qurylys jumystary aıaqtalyp, jańarǵan ǵımarattar paıdalanýǵa berilgen. Qazaqstan Respýblıkasy Konstıtýtsııasy 30 jyldyǵy qarsańynda medıtsınalyq mekemelerde saltanatty ashylý rásimi ótti.
№3 qalalyq emhananyń dırektory Aızat Moldagasımovanyń ózi basqaryp otyrǵan mekemeniń 91 jyldyq tarıhy bar ekenin atap ótti. Aıtýynsha, bul emhana 1934 jyly ashylǵan. Sońǵy ret kúrdeli jóndeý 15 jyl buryn istelgen.
– 2024 jyly qala ákimdiginiń kómegimen kúrdeli jóndeý jumystary bastaldy. Búgin resmı ashylý rásimi ótti. Qazirgi ýaqytta ǵımarattyń ishi-syrty, ınjenerlik tolyq jańartyldy. Joba quny – 1,1 mlrd teńge. Jańǵyrtý jumystary aıasynda klınıkalyq-dıagnostıkalyq zerthana ashyldy. Oǵan jańa 7 jabdyq arnaıy alyndy. Sonyń arqasynda buryn 1 saǵat jasaıtyn analızderdi 3 mınýtta alatyn boldyq. Odan bólek Almaty qalasy boıynsha alǵashqy «Damumed» júıesimen biriktirilgen daýystyq robot negizinde vırtýaldy assıstent qoıyldy. Bul termınalǵa naýqas kelip, ózine qajet talon ne ózge qyzmetti ala alady, - dedi ol.
Emhana dırektory kúrdeli jóndeýden keıin sımýlıatsııalyq ortalyq ashylǵanyna nazar aýdardy. Munda dárigerler, medbıkeler jáne kishi medıtsınalyq personal shuǵyl kómek kórsetý men júrek-ókpe reanımatsııasy daǵdylaryn tegin meńgeredi. Ortalyqta zamanaýı jabdyqtarmen jáne ártúrli manekendermen bar. Al tálim beretin mamandar Malaızııada oqýdan ótken.
– 2022 jyldan bastap munda respýblıkadaǵy jalǵyz mektep oqýshylary arasyndaǵy sýıtsıdtiń aldyn alý boıynsha Psıhologııalyq ortalyq jumys isteıdi. Bul ortalyq ıÝNISEF-pen seriktestikte qyzmet etip, balalar men jasóspirimderge kómek kórsetedi, psıhıkalyq densaýlyqqa qamqorlyq mádenıetin qalyptastyrýǵa yqpal etedi, - dedi ol.
Búgingi kúni mekemede 70 myńdaı adam tirkelgen – Bostandyq jáne Almaly aýdanynyń turǵyndary. Munda 516 qyzmetker jumys isteıdi, onyń ishinde 104 dáriger bolsa, 40-y sırek salalyq mamandar. Jalpy mekeme kúnine 500-800 adamdy qabyldaıdy.
Odan bólek megapolıste turǵyndarǵa jyldam sapaly medıtsınalyq kómek kórsetý úshin №8 qosalqy stantsııa tolyqtaı jańartylǵan. Jedel medıtsınalyq járdem qyzmetiniń №8 qosalqy stantsııasy meńgerýshisi Qojahmet Nurmanov kóp jyldan beri jóndeý kórmegen ǵımarat qazir zamanaýı standarǵa saı keletinin aıtty.
– Qosalqy stantsııa 2009 jyly ashylǵan. Ǵımarattyń kúrdeli jóndeý jumystary 2024 jyly qyrkúıekte bastalyp, bıyl shilde aıynda aıaqtaldy. Nysanda aýqymdy jumystar atqarylyp, tolyqtaı jańǵyrtyldy. Jańa tehnıka, jabdyqtar men jıhazdar alyndy. Sondaı-aq energııa únemdeıtin terezeler men esikter ornatyldy, jylytý jáne jeldetý júıeleri jańǵyrtyldy, LED-jaryqtandyrý engizildi jáne órt dabyl júıesi kúsheıtildi. Bul qyzmetkerlerdiń jumysyn jaıly ári qaýipsiz etýge ǵana emes, sonymen qatar jedel medıtsınalyq kómektiń sapasyn edáýir jaqsartýǵa múmkindik beredi, - dedi ol.
Sonymen qatar Qojahmet Nurmanov qosalqy stantsııa qalanyń 3 aýdanyn qamtyp otyrǵanyn aıtty. Onyń sózinshe, qosalqy stantsııada 17 brıgada bar.
– Byltyr 4 kólik berilgen, bıyl taǵy jańa kólikterdi kútip otyrmyz. Táýligine qyzmetkerlerimiz 200-300 shaqyrtýǵa barady, bárine úlgeredi. Brıgadalarymyz 15 paıyzdaı Áýezov pen Naýryzbaı aýdandaryna qyzmet kórsetedi, qalǵany tolyqtaı Alataý aýdany. Shamamen 200-250 myń adam qamtylady, - dedi qosalqy stantsııasy meńgerýshisi.
Qalada kúrdeli jóndeýden ótken taǵy bir nysan – №18 qalalyq emhananyń «Taýgúl» shaǵyn aýdanyndaǵy fılıaly. 2006 jyly salynǵan ǵımarat 19 jyldan keıin jańaryp, qazir ýaqytta kúnine 100-ge jýyq adamdy qabyldaı alady. Qoǵamdyq densaýlyq saqtaý basqarmasynyń málimetinshe, ǵımarattyń qasbeti jańartylyp, tereze-esikteri, ınjenerlik jelileri aýystyrylǵan. Mekeme aýlasy abattandyrylǵan. Budan basqa fılıalda zamanaýı nemis jáne japon taldaý qurylǵylarymen jabdyqtalǵan zerthana ashylyp, eki ýltradybystyq zertteý apparaty ornatyldy.