Zamanaýı sý únemdeý tehnologııalaryna kóshýge yntalandyrýdy jalǵastyrý qajet – Premer-mınıstr

- Prezıdent tapsyrmasyna sáıkes memleket tarapynan agrarlyq salaǵa aıtarlyqtaı qoldaý kórsetilip keledi. Egin sharýashylyǵyn ornyqty damytýǵa jáne aýyl sharýashylyǵy daqyldarynyń ónimdiligin arttyrýǵa baǵyttalǵan sýbsıdııalaý tetikterine basa kóńil bólinip jatyr. Memleket basshysy aýyl sharýashylyǵyn qoldaý sharalary bólingen qarajattyń kólemimen ǵana shektelip qalmaı, eń aldymen naqty ekonomıkalyq nátıjeni qamtamasyz etýge tıis ekenin atap ótti. Osy turǵydan alǵanda, egin oraǵyn sapaly ári ýaqtyly ótkizý – qoıylǵan maqsattarǵa qol jetkizýdiń basty sharttarynyń biri, - dedi Úkimet basshysy.

Premer-mınıstr bıylǵy eginshilik maýsymy ońaıshylyqpen ótip jatpaǵanyn basa aıtty.

- Ózderińiz biletindeı, vegetatsııa kezeńinde birqatar óńirde qýańshylyq beleń alyp, astyqtyń shyǵymyna qatysty alańdaýshylyq týǵyzdy. Degenmen, qabyldanǵan sharalardyń arqasynda ónimdilik ortasha deńgeıden joǵary bolady dep kútilip otyr. Sondaı-aq astyqtyń sapasy da joǵary. Saqtaýǵa túsken bıdaıdyń 74%-dan astamynyń qamyrlylyǵy jaqsy, 3-shi synypty jáne odan da joǵary, - dedi ol.

Oljas Bektenovtiń atap ótýinshe, zamanaýı agrotehnologııalardy qoldaný jáne tyńaıtqyshtardy ýaqtyly sebý naqty nátıje berip otyr.

- Budan bólek, Memleket basshysynyń tapsyrmasyna sáıkes, sý únemdeý tehnologııalaryn qoldanatyn alqaptardyń kólemin ulǵaıtý sharalary qabyldanýda. Qýańshylyq ári sý tapshylyǵy jaǵdaıynda bul bastamanyń mańyzy óte zor. Sondyqtan eginshilerdi zamanaýı sý únemdeý tehnologııalaryna kóshýge yntalandyrý tájirıbesin jalǵastyrý qajet. Jańbyrlatyp sýarý mashınalaryn, aýyl sharýashylyǵy tehnıkalaryn alǵandaı, jeńildetilgen qarjylandyrý sharttarymen satyp alý múmkindigin pysyqtaý kerek. Bul qajetti tehnıkalarǵa qoljetimdilikti arttyrýǵa múmkindik beredi. Óńirler agroónerkásip keshenin júıeli túrde qoldaýdy jalǵastyrǵan jón, - dedi Premer-mınıstr.

Aıta keteıik, otyrysta kúzgi jıyn-terim barysy qaraldy.