Zamanaýı medıtsınalyq tehnologııalar transfertin keńeıtýge múddelimiz – Oljas Bektenov
ASTANA. KAZINFORM — Úkimet basshysy Oljas Bektenov Túrki memleketteri uıymy delegatsııasy basshylarymen jáne Dúnıejúzilik densaýlyq saqtaý uıymynyń densaýlyq saqtaýdy damytý máseleleri jónindegi óńirlik bıýrosynyń dırektorymen kezdesý ótkizdi.
Premer-mınıstrmen ótken jıynǵa Ázerbaıjan Respýblıkasynyń mınıstri Teımýr Musaevpen, Qyrǵyz Respýblıkasynyń mınıstri Erkın Checheıbaevpen, Túrkııa Respýblıkasynyń mınıstri Kemal Memıshoglýmen, Ózbekstan Respýblıkasynyń mınıstri Asılbek Hýdaıarovpen, Majarstan Respýblıkasynyń Іshki ister jónindegi memlekettik hatshysynyń orynbasary ıÝdıt Bıdlomen qatysty. Sondaı-aq Túrki memleketteri uıymynyń Bas hatshysy Kýbanychbek Ómiralıev, DDU Eýropadaǵy óńirlik bıýrosynyń dırektory Hans Klıýge boldy. Densaýlyq saqtaý mınıstrleriniń 5-shi kezdesýiniń qorytyndysy boıynsha elimizdiń Densaýlyq saqtaý mınıstri Aqmaral Álnazarova baıandama jasady.
Tájirıbe almasýdy jáne zamanaýı medıtsınalyq tehnologııalar transferin qosa alǵanda, Qazaqstannyń uıymmen ózara is-qımylyn keńeıtý jónindegi josparlar talqylandy, Qazaqstannyń jáne basqa seriktes elderdiń densaýlyq saqtaýdy damytý jónindegi usynystary qaraldy.
Kezdesý barysynda densaýlyq saqtaý salasyndaǵy jahandyq syn-qaterlerge jaýap retinde TMU-ǵa qatysýshy memleketterdiń kúsh-jigerin shoǵyrlandyrýdyń mańyzdylyǵyna nazar aýdaryldy. Premer-mınıstr tek úılestirilgen is-qımyldar men tyǵyz áriptestik halyqtyń densaýlyǵyna tóngen aýqymdy qaýip-qaterlerge tıimdi jaýap berýge múmkindik beretinin atap ótti.
— Memleket basshysy Qasym-Jomart Toqaev medıtsınalyq kómektiń sapasy men qoljetimdiligin arttyrý máselelerine erekshe nazar aýdarady. Qazir biz densaýlyq saqtaý júıesin belsendi túrde jańǵyrtyp jatyrmyz, ıaǵnı ınfraqurylymdy jaqsartý, kópsalaly aýrýhanalar salý, olardy zamanaýı jabdyqtarmen qamtamasyz etý jáne farmatsevtıka ónerkásibin nyǵaıtý boıynsha aýqymdy jobalar iske asyp jatyr. Bizdiń bastamalarǵa Dúnıejúzilik densaýlyq saqtaý uıymy aıtarlyqtaı qoldaý kórsetip otyr. Tynys alý organdary men qan aınalymy júıesi aýrýlarynyń azaıýy jáne ólim-jitimniń tómendeýi, tehnıkalyq jáne sarapshylyq qoldaýǵa negizdelgen bizdiń birlesken josparly jumysymyzdyń nátıjesi. Biz óz tájirıbemizben bólisýge daıynbyz, sondaı-aq zamanaýı medıtsınalyq tehnologııalar transfertin keńeıtýge múddelimiz, — dep atap ótti Oljas Bektenov.
Jıyn barysynda seriktes elderdiń densaýlyq saqtaý mınıstrleri elimizdiń medıtsınalyq kómek kórsetý sapasyn jaqsartý salasyndaǵy jetistikterin atap ótti. Aldaǵy eki jylda MSAK-ty damytý, tótenshe jaǵdaıda medıtsınalyq kómek kórsetý, týberkýlezben jáne ózge de aýrýlarmen kúres, farmakologııadaǵy, atap aıtqanda Majarstannyń tıisti memlekettik organdarymen kooperatsııa, sý gıgıenasyn damytý jáne basqa da yntymaqtastyqty nyǵaıtý kózdelip otyr.
Birer kún buryn Úkimet basshysy Oljas Bektenov avıaotyn naryǵyn damytý máseleleri boıynsha keńes ótkizgen edi.