Zaman kóshinen qalyspaǵan qazaq baqtashylary – sheteldegi qazaq baspasózi
16 jastaǵy Batyrbek jasóspirimder arasyndaǵy jarysta top jardy – «Kaznews»
Baıan-Ólgıı aımaǵynyń «Tas túlek» klýbynyń palýany Batyrbek Shárivuly Óvórhangaı aımaǵynda uıymdastyrǵan memlekettik «gard» dárejeli palýan Ts.Bıamba-Otgonǵa qurmet kórsetýge arnalǵan saıysta jasóspirimder arasynda top jaryp, birinshi oryn ıelendi, dep habarlaıdy Mońǵolııanyń «Kaznews» aqparattyq portaly.
Atalǵan BAQ-tyń málimetinshe, Batyrbek Shárivuly 16 jasta. Sumyndyq pil dárejeli palýan ataǵy bar. Batyrbek buǵan deıin Zavhan aımaǵy ornaýynyń 100 jyldyǵyna oraı uıymdastyrylǵan mereıtoıda jasóspirimder arasynda top jarǵan bolatyn.
Sondaı-aq osy aptada «Kaznews»-te «Elshi Ǵabıt Qoıshybaev brıfıng ótkizdi» degen taqyryptaǵy aqparat jarııalandy.
Qazaqstan Respýblıkasynyń Mońǵolııadaǵy Elshiligi Ǵabıt Qoıshybaev QR Prezıdenti Qasym-Jomart Toqaevtyń 2023 jylǵy 1 qyrkúıekte Parlament palatalarynyń birlesken otyrysynda jarııalaǵan «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyna arnalǵan brıfıng ótkizgen.
Aıta keteıik, is-sharaǵa Mońǵolııa telearnalarynyń, aqparattyq agenttikteriniń jáne baspa basylymdarynyń ókilderi, sondaı-aq Mońǵolııanyń Strategııalyq zertteýler ortalyǵynyń sarapshylary shaqyryldy.
Bul týraly mońǵolııalyq basylym QR Elshiliginiń baspasóz qyzmetine silteme jasap habarlady.
Mońǵolııalyq BAQ-tyń dereginshe, brıfıng barysynda Qazaqstannyń Mońǵolııadaǵy Elshisi Ǵabıt Qoıshybaev mońǵol buqaralyq aqparat quraldary men sarapshylar qaýymdastyǵynyń ókilderine Joldaýdyń negizgi mazmuny men túıindi tustaryn jetkizdi.
«Atap aıtqanda, ol aýdıtorııany buǵan deıin Prezıdent Qasym-Jomart Toqaev usynǵan bastamalardy iske asyrýdaǵy jetistiktermen, sondaı-aq azamattardyń ómir súrý sapasyn odan ári jaqsartýǵa baǵyttalǵan eldiń áleýmettik-ekonomıkalyq ómirindegi ózgeristerdi tereńdetý boıynsha QR Úkimetiniń aldyna qoıǵan jańa mindetterimen tanystyrdy», -dep jazdy «Kaznews».
Shyńjańdyq eki qazaq sportshysy Hanchjoýdaǵy Azııa oıyndaryna joldama aldy – CNR
Shyńjań avtonomııalyq ólkesi sport bıýrosynyń málimeti boıynsha, Toqtarbek Tańatqanuly, Shıa Sını, Abdýhalykjan Mýtalıp, Abdýanı Týrǵýn, Lan Chaý, An Chıshýan jáne Kabıran Abýshaımanuly qatarly shyńjańdyq 7 sportshy Hanchjoýdaǵy Azııa oıyndaryna joldama aldy. Olar jaǵajaı voleıboly, jeńil atletıka, boks, at sporty, sadaq atý jáne kúresten qatysady, - dep habarlaıdy Qytaıdyń «Ortalyq halyq radıosy» aqparattyq portaly.
Aıta keteıik, Altaı qalasynan kelgen 26 jastaǵy Toqtarbek Tańatqanuly Azııa oıyndaryna osymen ekinshi ret qatysyp otyr. 2021 jyly Tokıo Olımpıadasyna qatysyp, 1/8 fınalda chempıon atanǵan brazılııalyq oıynshydan 2:3 esebimen jeńilip qaldy. 2023 jylǵy bokstan álem chempıonatynda Toqtarbek Tańatqanuly fınalǵa deıin jetip, sońynda qazaqstandyq boksshyǵa ese jiberip, kúmis júldeni qanaǵat tutqan. Osy Azııa oıyndarynda ol taǵy da chempıon bolýǵa talasady.
Al Kabıran Abýshaımanuly atty ulty qazaq sportshy bıyl 25 jasta, ol Tarbaǵataıdyń Emın okrýginen. Osy jyldyń aqpan aıynda K.Abýshaımanuly Dúnıejúzilik kúres federatsııasynyń ashyq chempıonatynda erler arasynda erkin kúresten 97 keli salmaqta qola júldeni jeńip aldy. Sáýir aıynda 2023 jylǵy kúres túrlerinen Azııa chempıonatynyń kúmis júldegeri atandy. Sondaı-aq maýsym aıynda Qyrǵyzstandaǵy Dúnıejúzilik kúres federatsııasynyń halyqaralyq upaılar týrnırinde taǵy da kúmis júldeni enshilegen.
Ámir Temir dáýirine jatatyn aýyl qırandylary tabyldy – «ÓzA»
Qashqadarııa oblysynyń Múbárák aýdanyndaǵy Qoja Ravshan eskertkishi mańynan Ámir Temir dáýirine jatatyn aýyl qırandylary tabyldy.
Mádenı mura agenttiginiń málimetinshe, Samarqand arheologııalyq ınstıtýtynyń qyzmetkerleri qazba jumystary kezinde aýyl qırandylarynyń arasynan Ámir Temir dáýirine jatatyn 4 bólme tapqan, dep habarlaıdy «ÓzA» aqparattyq agenttigi.
13-14 ǵasyrlarda bul eskertkishtiń ornynda Qarshydan Buharǵa aparatyn qalyń kerýen joly ornalasqan. Aýyl qırandylarynyń aýdany búginde 30 gektar.
Ózbekstandyq BAQ-tyń deregine súıensek, mamandardyń aıtýynsha, sol kezde ómir súrgen aýyl turǵyndary sońǵy shaǵataı dáýiriniń sońy men Ámir Temir tusynda mádenı jaǵynan birshama damyǵan. Tabylǵan zattardyń ishinde taqtaıshalar, syrlanǵan qysh ydystar, metall aýylsharýashylyq quraldary jáne basqa da sırek kezdesetin zattar bar. Zertteýshiler Ámir Temir tusynda qalalarda ǵana emes, aýyldarda da damý deńgeıi joǵary boldy degen aldyn ala qorytyndyǵa kelgen.
Zamana kóshine ilesken qazaq baqtashylary – CNR
«Qazaq malshylary da zamana kóshiniń aldynda keledi». Osy aptada Qytaıdyń «Ortalyq halyq radıosy» aqparattyq agenttiginde osyndaı taqyryptaǵy aqparat jarııalandy.
Kıiz úıde ómir súrý, sýretter tartý, vıdeoǵa túsirý sııaqtylardyń barlyǵy olardyń qoldarynan keledi. Sóıtip, mal sharýashylyq raıondary da osylaı zamana kóshinen qalmaı keledi, dep jazady «Ortalyq halyq radıosy».
Úrimji qalasynan shyǵyp, batys óńtústikte kósilip jatqan alyp Tııan-Shan taýyn betke alyp jolǵa shyqsańyz, úlken qala birden alystap qala beredi. 100 shaqyrymnan astam jol basqan soń, bir asýdan asa qalsańyz, keń kósilgen jaılaýǵa jetesiz. Bul jerden jaz kúnderi jaılaý syndy jánnat ólkeniń sánin keltirer qoraly qoı, úıirli jylqy, tabyn-tabyn sıyrlar men aq shaǵaladaı qazaq úılerdi keziktiresiz.
Bul eldi meken Úrimji men Sanjynyń (qala – avt.) aralyǵyna ornalasqan Sorbastaý mal sharýashylyq aýdany.
«Bir qyzyǵy jasyl jaılaý, móldir bulaq boıyna qonystanǵan maldy aýyl qazaq ultynyń ǵasyrlar boıy jalǵasqan kóshpendi turmysyna muragerlik etýmen birge, qazirgi zamanǵy qala tirshiliginen de kende emestigi birden baıqalady. Dástúrli jáne osy zamanǵy tirlik tynysyn bir basyna jıǵan Sorbastaýdy Shyńjańdaǵy mal sharýashylyq aýdandarynyń yqshamdalǵan kórinisi deýge ábden bolady», dep jazady qytaılyq basylym.
Munda kóptegen týrıst birden asqar taý, asaý ózenderimen áıgili bolǵan Sorbastaýǵa at basyn burady. Atalǵan jaılaýdaǵy Muhtardyń otbasy týrısterdi kútip alady. Jaz jaılaýdyń rahatyn sezingisi kelgen qalalyqtaryń birazy onyń kıiz úıden jasalǵan demalys ornyn tańdaıdy. Týrısterdiń aıaǵy jaz boıyna úzilmeıdi eken.
Bir jaǵynan baqtashy, bir jaǵynan jazdyq demalys ornyn ashqan taǵy bir jeke kásipker Nurshash Qabylqyzy qonystanǵan jaılaýy da Muhtardyń qonysynan bir kezeń bólip turatyn kórshi. Nurshash óziniń jazdyq demalys ornyn jurtqa tanystrý úshin telefon arqyly fotosýret túsirip ony áleýmettik jelilerde jarııalap otyrady.
Qytaılyq BAQ-tyń dereginshe, Nurshashtyń jelidegi paraqshasynda 100 myńǵa jýyq adam tirkelgen. Sondyqtan 47 jastaǵy Nurshash Qabylqyzy osy jaılaýdaǵy eń belgili «jeli juldyzy» atanǵan kórinedi.
Ol joldaǵan joldamalardyń mazmuny ártúrli. Keıde qazaqtyń ulttyq kıimin kıip shyqsa, keıde qazaqtyń dástúrli bıi «Qara jorǵany» tartý etedi. Al endi birde jaılaý tósinde seıildep bara jatady... Osylaı ártúrli taqyryptardaǵy kórinister jarııalaý arqyly turmysyn kún sanap jaqsartýda.
Ol tek ózi ǵana emes, aınalasyndaǵy adamdardy da jumyspen qamtyp otyr eken.
«Internet arqyly elge tanylǵan soń, Nurshashtyń paıdasy eselep artty. Ol ózi otyrǵan aǵash úıdiń aldyna 13 kıiz úı tigip, saıajaı ashqan. Sharýashylyǵyna jetise almaǵandyqtan 4-5 baqtashyny kómekke alǵan... Buǵan qarap, qazir mal sharýashylyq aýdandary da zamana kóshiniń aldyńǵy leginde keledi deýge bolady. Internetti qamtyǵan osy zamanǵy qurylǵylar baqtashylardyń tirshiligin barynsha ózgertip, olardyń kókjıegin keńeıtken...», - dep jazady qytaılyq BAQ.
Túrkııaǵa jeti aıda 30 mıllıonnan astam týrıst kelgen – «TRT»
Túrkııa 2023 jyldyń alǵashqy 7 aıynda barlyǵy 30 mln 93 myń 446 qonaqty qabyldady, dep habarlaıdy Túrkııa Radıo Televızııa portaly.
Atalǵan BAQ-tyń keltirgen málimetinshe, Túrkııaǵa 7 aıda kelgen týrıstterdiń 26 mıllıon 766 myń 240-y sheteldik, 3 mıllıon 327 myń 206-sy shetelde turatyn azamattar (?).
Qańtar-shilde kezeńinde Túrkııaǵa kelgen sheteldikter sany ótken jyldyń birdeı kezeńimen salystyrǵanda 16,22 paıyz artqan.
Túrkııaǵa eń kóp týrıst jibergen elder reıtınginde Reseı birinshi orynda tur. Ótken jyldyń birdeı kezeńine qaraǵanda 59,22 paıyz artyp, 3 mıllıon 498 myń 614 adam kelgen.
Germanııa 7,32 paıyz ósim jáne 3 mıllıon 211 myń 724 adammen ekinshi, Ulybrıtanııa 14 paıyz ósim jáne 2 mıllıon 63 myń 740 adammen úshinshi boldy. Bul elderden keıingi orynda Bolgarııa men Iran tur.
Qazaqstan Kaspıı teńizinde qoldaný úshin eki tanker satyp aldy – «Parstoday»
Qazaqstan Energetıka mınıstriniń orynbasary Erlan Aqynjanov jeksenbi kúni «Astana úkimeti Kaspıı teńizinde qoldaný úshin eki tanker satyp aldy», - dedi.
Bul týraly osy aptada ırandyq «Parstoday» aqparat agenttigi habarlady.
«Parstoday» aqparat agenttiginiń habarlaýynsha, Erlan Aqynjanov: «Qazaqstan munaı eksporttaýǵa balama joldar qarastyryp jatyr. Biraq osy kúnge deıin eń tabysty baǵyt Kaspıı qubyr jelisi konsortsıýmy (SRS) boldy. Ol Qazaqstan munaıyn Atyraý oblysynan Novorossıısk aılaǵyna tasymaldaıdy», - degen.
Kaspıı konsortsıýmynyń qubyr jelisi Qazaqstannyń Teńiz kenishinen Qara teńizdegi Reseıdiń Novorossıısk aılaǵyna jaqyn mańdaǵy munaı termınalyna deıin tartylǵan. Qubyr jelisiniń uzyndyǵy – 1580 km. Reseıdiń úlesi – 31 paıyz, Qazaqstannyń úlesi – 19 paıyz.
