Zalalsyzdandyrý júrgizilip jatyr: Almatyda RFMM oqýshylary ekinshi toqsanda onlaın bilim alady
ALMATY. KAZINFORM — Almatydaǵy Respýblıkalyq fızıka-matematıka mektebinde (RFMM) qajetti sanıtarııalyq-profılaktıkalyq jáne zalalsyzdandyrý jumystary júrgizilip jatyr.
«RFMM» KeAQ baspasóz qyzmetiniń málimetinshe, qazir mektepte anyqtalǵan eskertýlerdi joıý boıynsha tıisti sharalar qabyldanyp jatyr. Osyǵan baılanysty oqý jylynyń ekinshi toqsanynda oqýshylar onlaın formatta bilim alatyn bolady.
— Qazirgi ýaqytta oqýshylar kúzgi demalysta. Ekinshi toqsanda sabaqtar ýaqytsha qashyqtan oqytý formatynda jalǵasady. Dástúrli oqý formatyna kóshý máselesi barlyq qajetti sanıtarııalyq-profılaktıkalyq jumystar tolyq aıaqtalyp, sanıtarııalyq talaptardyń saqtalýy qamtamasyz etilgennen keıin qarastyrylady, — dep habarlady RFMM.
Eske salaıyq, 14 qazanda RFMM-niń 48 oqýshysy jiti ishek ınfektsııasynyń belgilerimen aýrýhanaǵa jatqyzyldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. 14–16 qazan aralyǵynda mektep sabaqtary onlaın formatta ótti.
Sondaı-aq atalǵan derek boıynsha Bostandyq aýdandyq polıtsııa basqarmasy janyndaǵy polıtsııa bóliminde qylmystyq is qozǵaldy.
Keıin aýrýhanaǵa túsken oqýshylardyń sany artqany belgili boldy.
22 qazanda Almatyda ýlanǵan RFMM oqýshylarynyń barlyǵy emhanadan shyǵaryldy.
Almaty qalasynyń sanıtarııalyq-epıdemıologııalyq baqylaý departamenti zerthanalyq zertteý nátıjelerimen bólisti. Ol boıynsha mekteptiń tórt qyzmetkerinen stafılokokk bakterııasy anyqtalǵan. Sondaı-aq taǵamdardan mıkrobtyq lastaný, taǵam synamalary men ydystardan alynǵan shaıyndylardan ishek taıaqshalary tobynyń bakterııalary tabyldy. Qazir «MasterFood» JShS ashanasy men RFMSh mektep-ınternatynyń qyzmeti 60 kún merzimge toqtatylǵan.
