Zalal 300 mln teńge: ShQO-da eki jyl boıy zańsyz altyn óndirgender ustaldy
ÓSKEMEN. KAZINFORM — ShQO QMA departamenti UQKD jáne prokýratýramen birlesip, Ulan aýdany Shybyndy ózeniniń ańǵarynda baǵaly metaldardy zańsyz óndirý jáne jer qoınaýyn óz betinshe paıdalaný faktisin anyqtady.
Kúdiktiler zańnama talaptaryn buzyp, lıtsenzııasyz eki jyl boıy ózen arnasyn ózgerte otyryp zańsyz altyn óndirgen.
Ken óndirýde aýyr arnaıy tehnıka men kendi qaıta óńdeýge arnalǵan ónerkásiptik jabdyq qoldanylǵan.
— JShS zańsyz qyzmeti saldarynan keltirilgen tek ekologııalyq zalal 300 mln teńgeden asty. Tintý barysynda quny 382 mln teńge quraıtyn 6 kg altyn tárkilendi, — delingen QMA habarlamasynda.
Uıymdastyrýshy eki aı merzimge qamaýǵa alyndy.
Tergeý jalǵasyp jatyr.
QPK-niń 201-babyna sáıkes ózge aqparat jarııalaýǵa jatpaıdy.
Aıta ketelik Shyǵys Qazaqstan oblysy Marqakól aýdanyndaǵy altyn qazýshylarǵa qatysty tekserý júrgizý úshin arnaıy komıssııa qurylǵan edi.