Zalal 1,6 mln teńge: Qaraǵaılardy elordaǵa jasyryn jetkizbek bolǵan júrgizýshi ustaldy

ASTANA. KAZINFORM – Astana – Petropavl avtojolynda patrýldik polıtsııa qyzmetkerleri ruqsatsyz 31 qaraǵaı tasymaldaǵan GAZel avtokóligin toqtatty. Tekserý barysynda aǵashtar Bulandy aýdanynyń aýyldyq ákimdikteriniń birine tıesili ekeni anyqtaldy. 

Zalal 1,6 mln teńge: Qaraǵaılardy elordaǵa jasyryn jetkizbek bolǵan júrgizýshi ustaldy
Foto: Polisia.kz

Polisia.kz málimetinshe, keltirilgen zalal – 1,6 mıllıon teńge. 

Kóliktiń artynda 38 jastaǵy er adam otyrǵan. Aldyn ala málimet boıynsha ol júkti elordaǵa jetkizýdi josparlaǵan, alaıda aǵashtardy tasymaldaýdyń zańdylyǵyn rastaıtyn qujattary bolmady. Odan ári mán-jaıdy anyqtaý úshin júrgizýshi polıtsııa bólimine jetkizildi. 

Urlyq faktisi boıynsha qylmystyq is qozǵaldy. Sotqa deıingi tergep-tekserý bastaldy. Oqıǵanyń barlyq mán-jaıy anyqtalady. 

– Polıtsııa aǵashtardy zańsyz kesý jáne aǵash jymqyrý qorshaǵan ortaǵa zııan keltiredi jáne zańda kózdelgen jaýapkershilikke ákep soǵatyny týraly eske salady. Aǵashty satyp alý, tasymaldaý jáne satý zańdy negizde júzege asyrylýy tıis. Aǵashtar men basqa da orman resýrstaryn tasymaldaý aldynda tıisti ruqsat qujattarynyń bar ekenine kóz jetkizý qajet, – delingen aqparatta. 

Polıtseıler azamattardy tabıǵı baılyqqa uqypty qaraýǵa, aǵashtardy zańsyz kesýge jáne urlaýǵa jol bermeýge, al mundaı faktiler bolǵan jaǵdaıda polıtsııaǵa 102 nómiri boıynsha habarlaýǵa shaqyrdy.

Buǵan deıin Abaı oblysynda zańsyz jumys istegen eki aǵash kesý tsehynyń qyzmeti toqtatyldy.