Zalal 152 mln teńge: jalǵan qujatpen agrosýbsıdııa alǵan qojalyq basshylaryna úkim shyqty
ASTANA. KAZINFORM — Kokshetaý qalasynda agroónerkásip kesheni sýbektilerine beriletin memlekettik sýbsıdııalardy jymqyrý isi boıynsha úkim shyǵaryldy. Bul týraly Qarjylyq monıtorıng agenttigi málim etti.
Tergeýdi QMA Aqmola oblysy boıynsha departamenti júrgizdi. Eki jyl boıy «MolProdJarkaın» ÁKK dırektory A. S. Efımkına jáne «Rassvet» sharýa qojalyǵynyń basshysy A. V. Maslov sút jáne ony tereń óńdeý ónimderiniń óndirisin arzandatýǵa arnalǵan sýbsıdııalardy zańsyz alǵan.
— «Rassvet» sharýa qojalyǵynda málimdelgen kólemde sút óndirýge jetkilikti mal basy bolmaǵan. Soǵan qaramastan elektrondyq shot-faktýralar aqparattyq júıesinde «MolProdJarkaın» ÁKK-ne 3 mln kg-nan astam shıki sút jetkizilgeni týraly jalǵan qujattar rásimdelgen. Osy qujattar negizinde sútti sary maı men qatty irimshikke óńdeý týraly esepter jasalyp, ýákiletti organ ótinimderdi maquldaǵannan keıin qarajat kásiporynnyń esepshotyna aýdarylǵan, — delingen habarlamada.
Memleketke keltirilgen jalpy zalal 152 mln teńgeni qurady. Budan bólek, alynǵan sýbsıdııalardyń bir bóligi jasyrý maqsatynda Efımkınanyń týysynyń depozıttik shotyna aýdarylǵan. Keıin bul qarajatqa jalǵa berilip, tabys tabý úshin paıdalanylǵan mobıldi ǵımarat satyp alynǵan.
Tergeý barysynda 6 jer ýchaskesine, 4 páterge, 11 avtokólikke, mobıldi ǵımaratqa jáne óndiristik nysanǵa tyıym salyndy. Sot úkimimen A. V. Maslov pen A. S. Efımkına 6 jyl 4 aı merzimge bas bostandyǵynan aıyryldy. Mobıldi ǵımarat memleket kirisine tárkilendi.
Qalǵan múlikke salynǵan tyıym azamattyq talap tolyq oryndalǵanǵa deıin saqtalady. Úkim zańdy kúshine endi.
Aıta keteıik, buǵan deıin Qarjylyq monıtorıng agenttigi zeınetaqy qorynan 200 mlrd teńge zańsyz sheshilgenin málimdegen edi.