Zal toly kórermen, óner juldyzdary, áıgili prodıýserler jastar: Dımashtyń Gvadalaharadaǵy kontserti
ASTANA. KAZINFORM - 17 qarashada qazaqstandyq ánshi Dımash Qudaıbergenniń Gvadalaharada alǵash ret ótken jeke kontserti Auditorio Telmex arenasyna lyq toly kórermen jınady, dep jazady dimashnews.
Jańa DIMENSIONS shoýy Meksıkanyń úshinshi qalasynda da tyńdarman yqylasyna bólendi.
Kontsertin óziniń «Dimensions» ánimen bastaǵan Dımash shyǵarmashylyq jolyn tanystyrady. Qıyndyq pen qyzyqqa toly bul jolda ol júregine qaıta jalyn syılaıtyn jaryq sáýlege umtylady. Onyń tańdaǵan baǵyty ózgelerden bólek. Ol bıikterdi baǵyndyrýǵa kúsh-jigeri jetetinine senimdi. Kún saıynǵy synaqtardy eńserip, kedergilerge moıymaı, bıikke samǵaýdy maqsat etedi.
Shoýdyń tıtýldy ániniń áýenin Dımash, al sózin qazaqstandyq mýzykant ári án avtory Saıan Rahymjan jazǵan.
Alǵashqy áninde Dımash aınalany nurǵa bólep, úmit syılaıtyn jaryq týraly tolǵaıdy. Tyńdarmandaryn bir keńistikten ekinshi keńistikke sapar shegýge shaqyrady. Bir sátte tutas bir qaýymǵa aınalǵan kórermen ár ánmen birge Dımashtyń shyǵarmashylyq álemine tereńdeı túsedi…
Dımashtyń Latyn Amerıkasyndaǵy kontsertterine jasy, ulty men tili ártúrli tyńdarmandardy kezdestirýge bolady. Qazaqstandyq ánshiniń biregeı ónerine tánti jastardyń qatary qalyń. Bir kontserttik baǵdarlama aıasyna operalyq vokaldyń djaz, fank, pop jáne rep sııaqty birneshe janrlardyń syıyp ketýi men odan ári klassıkalyq mýzykalyq úndestikke ulasýy kórermenderdi qaıran qaldyrdy.
Dımashtyń jankúıerleri arasynda mádenıet salasynda mol tájirıbe jınaqtaǵan aǵa býyn ókilderi de bar.
Gvadalaharadaǵy kontsertke áıgili meksıkalyq ánshi, akter ári prodıýser Vısente Fernandestiń jubaıy Marııa Vılıasenor da keldi.
Gvadalaharada dúnıege kelgen maestro Vısente «Úzdik meksıkalyq albom» atalymy boıynsha birneshe márte «Gremmı» syılyǵyn ıelengen.
Vısente Fernandestiń kınodaǵy shyǵarmashylyq joly 1960 jyldardyń sońynda bastaldy. Ol otyzdan astam fılmge túsip, olardyń ishinde 10 kınoda prodıýser qyzmetin de atqarǵan.
Mýzyka salasynda elýden astam albom shyǵarǵan ónerpazdyń 61 áni Billboard Hot Latin Songs chartyna enip, olardyń jıyrmasy úzdik ondyqtan oryn alǵan.
Marııa hanym DimashNews redaktsııasymen Dımashtyń kontsertinen alǵan áserin bólisti.
Dımashtyń mýzykasymen alǵash qalaı tanystyńyz?
– Dımashtyń ónerimen shamamen úsh jyl buryn ınternetten onyń sahnadaǵy ónerin tamashalaǵanda tanystym. Onyń oryndaýshylyq sheberligi men qaıtalanbas mýzykalyq daryny meni birden baýrap aldy.
Alǵash tyńdaǵan ári men tánti etken týyndy – «Ave Maria» vokalızi. Al qazirgi meniń súıikti ánim – «Moonlight».
Kontsertte Dımash sizge qandaı áser qaldyrdy?
– Dımash – perishtedeı ásem únge ıe, erekshe daryn ıesi. Onyń oryndaýshylyq sheberligine tántimin. Búgingi kontsertte ár týyndyny asqan talǵammen oryndaýy maǵan erekshe áser etti.
Dımashqa ne aıtar edińiz? Álemniń túkpir-túkpirindegi onyń dostaryna qandaı oı jetkizgińiz keledi?
– Dımashqa óner jolynda asqaraly asýlardy baǵyndyryp, dara darynymen álem jurtshylyǵyn tánti ete berýin tileımin. Dımashtyń aıryqsha daýysyn tyńdap, ánderindegi tereń maǵynany ár adam sezine alsa eken. Onyń mýzykasy barsha jurttyń qulaǵyna jetýge laıyq ekenine kúmánim joq.
Osy juma jáne senbi kúnderi Dımash barsha tyńdarmanyn Meksıka astanasynda kútedi.
Osyǵan deıin Dımashtyń Meksıkadaǵy kontserti qarsańynda jankúıerler bas qosqan bolatyn.