Zákir Safıýllın olımpıadalyq irikteý týrnıriniń kúmis júldegeri atandy

AMMAN. QazAqparat – Iordanııanyń Amman qalasynda ótip jatqan bokstan Olımpıadaǵa irikteý týrnırinde Zákir Safıýllın kúmis medal jeńip aldy, dep habarlaıdy QazAqparat tilshisi.

63 keli salmaqta el namysyn qorǵaǵan otandasymyz fınalda ózbek boksshysy Elnýr Abdýraımovpen qolǵap túıistirdi.

Jekpe-jek alǵashqy mınýttardan-aq tartysty bastaldy. Birinshi raýnd qorytyndysy boıynsha Safıýllın alǵa shyqty. Bes tóreshiniń tórteýi jerlesimizdi jeńimpaz dep tapsa, ekinshi raýndta ózbek boksshysy esepti teńestirip ketti. Al sheshýshi úshinshi raýndta eki boksshy da teńdeı dárejede judyryqtasty. Alaıda, tóreshiler ózbek boksshysyn jeńimpaz dep tapty.

Osylaısha, Z. Safıýllın atalǵan týrnırde Olımpıada joldamasymen qatar kúmis júldeni de qosa jeńip aldy.

Endi, sanaýly mınýttardan keıin 75 keli salmaqta Ábilhan Amanqul, 81 keli salmaqta Bekzat Nurdáýletov jáne 91 keli salmaqta Vasılıı Levıt «altyn» úshin rıngke shyǵady.