Zakır Safıýllın bokstan Olımpıadaǵa irikteý týrnıriniń fınalyna shyqty

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde qazaq boksshylary arasynan Zakır Safıýllın birinshi bolyp fınalǵa joldama aldy, dep habarlaıdy QazAqparat tilshisi.

Erler arasynda 63 keli salmaqta el namysyn qorǵap jatqan otandasymyz Zakır Safıýllın jartylaı fınalda jergilikti boksshy Obada Mohammed Mustafa Alkasbehpen judyryqtasty.

Jekpe-jek alǵashqy mınýttardan-aq tartysqa toly boldy. Alǵashqy raýndta jergilikti boksshynyń qarqyny joǵary kórindi. Alaıda, ekinshi raýndta qazaqstandyq boksshy tarazy basyn ózine aýdaryp, jekpe-jekti odan ary qyzdyryp jeberdi. Sońǵy raýndta jerlesimiz qarsylasyna aýyr soqqylaryn daryta otyryp, jeńisti julyp aldy. Tóreshiler bir aýyzdan qazaq boksshysyn jeńimpaz dep tanydy.

Osylaısha, Zakır Safıýllın qazaq boksshylary arasynan alǵash bolyp Olımpıadalyq irikteý týrnıriniń fınalyna shyqty.

Endi, sanaýly mınýttardan keıin, 69 keli salmaqta Abylaıhan Júsipov pen 91 keli salmaqta Vasılıı Levıt sharshy alańǵa shyǵady.