Zakır Safıýllın álem chempıonatyndaǵy alǵashqy kezdesýinde jeńiske jetti

NUR-SULTAN. QazAqparat - Reseıdiń Ekaterınbýrg qalasynda ótip jatqan bokstan álem chempıonatynda qazaqstandyq taǵy bir bylǵary qolǵap sheberi Zakır Safıýllın alǵashqy jekpe-jegin jeńispen bastady, dep habarlaıdy QazAqparat tilshisi.

Zakır Safıýllın 63 keli salmaqta synǵa tústi. Sharshy alańda ázerbaıjan jigiti Bahtııar Gazıbaevtan basymdyq tanytty.

Qazaqstandyq boksshy 1986 jyly Shymkent qalasynda dúnıege kelgen. Búgingi kúnge deıin Azııa chempıonatynda 2015 jáne 2019 jyldary kúmis júldeger atandy. Al 2015 jyly álem chempıonatynda jarystyń alǵashqy satysynan asa alǵan joq.
Reseıdegi álem chempıonatynda buǵan deıin 81 keli salmaqta qazaqstandyq taǵy bir boksshy Bekzat Nurdáýletov alǵashqy jekpe-jeginde jeńiske jetken bolatyn.
Qazaqstan boksshylary álem chempıonatyna 1993 jyldan beri qatysyp keledi. Búgingi kúnge deıin olar barlyǵy 40 medalge qol jetkizdi. Medaldiń 11-i altyn, 12-i kúmis jáne 17-i qola bolyp sanalady.
Bıylǵy álem chempıonatynda qazaqstandyq qurama sapynda segiz sańlaǵymyz sharshy alańǵa shyǵady. Olardyń qatarynda Sáken Bıbosynov (48 keli), Qaırat Erálıev (57 keli), Zakır Safıýllın (63 keli), Abylaıhan Júsipov (69 keli), Tursynbaı Qulahmet (75 keli), Bekzat Nurdáýletov (81 keli), Vasılıı Levıt (91 keli) jáne Qamshybek Qońqabaev (91 keliden joǵary) bar.