Zákıeva Almaty oblysyndaǵy mektep-ınternaty jaıynda: 170 bala aýyr jaǵdaıda ómir súrip jatyr
ASTANA. KAZINFORM – Balalar ombýdsmeni Dınara Zákıeva Almaty oblysyndaǵy mektep-ınternattyń jaǵdaıymen tanysty.

- Keshe Almaty oblysynda «Balalardy qorǵaý» qorynyń jetekshisi Janna Ahmetovamen birge I. Núsipbaev atyndaǵy mektep-ınternatyndaǵy balalardyń ómir súrý jaǵdaıyn zerttedik. 6 jastan asqan 170 bala ınternatta aýyr jaǵdaıda ómir súrip jatyr. Úsh jyl buryn mekemede kúrdeli jóndeý jumystary bastalǵanymen, merdiger ony aıaqtamaı ketken. Sonyń saldarynan balalar jartylaı qıraǵan ǵımaratta turýǵa májbúr. Oqý korpýsynda túnep, sportzalda tamaqtanady, sanıtarlyq-gıgıenalyq normalar da buzylyp otyr, - dep jazdy D. Zákıeva Instagram-daǵy paraqshasynda.
Bul máseleni jáne oblystaǵy balalar qaýipsizdigine qatysty taǵy eki mańyzdy másele Almaty oblysynyń ákimi Marat Sultanǵazıevpen kezdesý barysynda talqylanǵan. Ákimdik jóndeý jumystaryn aıaqtaý nemese jańa ınternat salý máselesin qarastyrǵan. Alaıda balalardyń qazirgi qıyn jaǵdaıynda qalmaýy úshin olardy jaqynda jóndeýden ótken jáne bos oryndary bar basqa ınternatqa kóshirý týraly sheshim qabyldandy.
- Sondaı-aq kezdesýde Psıhologııalyq qoldaý ortalyǵynyń jumysy men qorǵanshylyq organdary qyzmetkerleriniń sanyn arttyrý máselesi kóterildi. Qabyldanǵan zańǵa sáıkes, 5000 balaǵa 1 qyzmetkerden kelýi kerek. Osylaısha, oblysta 109 qyzmetker bolýy tıis, ár aýdanda shamamen 10 mamannan. Bul júıeniń tıimdi jumys isteýi, balalardy qorǵaý jáne zorlyq-zombylyqtyń aldyn alý sharalaryn sapaly júrgizý úshin óte mańyzdy, - delingen ombýdsmen málimetinde.
Budan bólek ol óńirlik ýákil Aıgúl Esimbekovamen jáne Psıhologııalyq qoldaý ortalyǵynyń ujymymen kezdesti. Qazirgi kezde ortalyqtyń kýratorlary mektepterdi aralap, sýıtsıdtiń aldyn alýǵa arnalǵan biryńǵaı baǵdarlama engizý jumysyn atqaryp jatyr.
- Aıta ketý kerek, sáýir aıynda Almaty oblysynyń aýdandarynda Oqý-aǵartý mınıstrligi Balalardyń quqyqtaryn qorǵaý komıteti, Mádenıet, Densaýlyq saqtaý, Іshki ister mınıstrlikterindegi áriptestermen birge 7-10 kúndik jumys josparlap otyrmyz, - dep túsinderdi D. Zákıeva.
Buǵan deıin Dınara Zákıeva 12 jasqa deıingi balalardy úlkenderdiń qaraýynsyz qaldyrýǵa zańdy túrde tyıym salý týraly bastama kóterdi.