Zaimer.kz klıentteri jeke derekteriniń taralýy: mıkroqarjy uıymyna aıyppul salyndy

ASTANA. KAZINFORM - Zaimer.kz mıkroqarjy uıymynyń klıentteri sanalatyn qazaqstandyqtardyń 2 mln-nan astam jeke derekteriniń taralýyna taldaý jasaldy, dep habarlaıdy Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmeti. 

"5 naýryzda «Memlekettik tehnıkalyq qyzmet» AQ (MTQ) zaimer.kz («MQU «Robokesh.kz» JShS) mıkroqarjy uıymynyń klıentteri sanalatyn qazaqstandyqtardyń 2 mln.-nan astam jeke derekteriniń taralýyn anyqtady.

MTQ Qazaqstan azamattarynyń arasynan «MFO Robokesh.kz» JShS klıentterin anyqtaı otyryp, taralǵan derekterge taldaý júrgizdi.

«Ulttyq aqparattyq tehnologııalar» AQ Egov Mobile mobıldi qosymshasy arqyly azamattarǵa, sondaı-aq Egov portalynyń jeke kabınetine qylmyskerlerdiń jeke derekterine qol jetkizýdiń yqtımal teris saldaryn boldyrmaý úshin tıisti habarlamalar men usynystar jiberdi" delingen habarlamada. 

Málimetke saı, habarlandyrý júıesi pılottyq rejımde iske qosylǵan. Óıtkeni azamattardy derbes derekterdiń syrtqa shyǵýy týraly habardar etý quzyreti 2023 jylǵy 11 jeltoqsanda belgilengen jáne «Qazaqstan Respýblıkasynyń keıbir zańnamalyq aktilerine aqparattyq qaýipsizdik, aqparattandyrý jáne tsıfrlyq aktıvter máseleleri boıynsha ózgerister men tolyqtyrýlar engizý týraly» Zańyna sáıkes 2024 jylǵy 1 shildeden bastap qoldanysqa engiziledi.

Búgingi tańda atalǵan faktige qatysty mınıstrlikke azamattardan 5200-den astam ótinish kelip túsken.

"Mınıstrliktiń Aqparattyq qaýipsizdik komıteti Qazaqstan Respýblıkasy Qarjy naryǵyn retteý jáne damytý agenttigimen birlesip, «Robokesh.kz» «MQU» JShS-ne Qazaqstan Respýblıkasynyń derbes derekter jáne olardy qorǵaý týraly zańnamasynyń talaptaryn saqtaýyna qatysty jospardan tys tekserý júrgizdi.

Tekserý qorytyndysy boıynsha ákimshilik is qozǵalyp, «MQU Robokash.kz» JShS ákimshilik jaýapkershilikke tartylyp, 1000 AEK mólsherinde, jeńildetilgen tártipte aıyppul salyndy, QR ÁQBtK-niń 79-babynyń tórtinshi bóligine sáıkes 500 AEK (1 846 000 teńge) kóleminde aıyppul tólendi.

Bul rette azamattar Qazaqstan Respýblıkasy Azamattyq kodeksiniń 951-babyna sáıkes derbes derekterdiń taralýynan keltirilgen materıaldyq nemese moraldyq zııandy óteý týraly máseleni qaraý úshin azamattyq sotqa júginýge quqyly" delingen mınıstrlik habarlamasynda.

Sonymen qatar, vedomstvo Egov Mobile qosymshasynda nesıe alýǵa ýaqytsha shekteýler qyzmetin paıdalanýdy, sondaı-aq myna silteme boıynsha Mınıstrliktiń veb-saıtynda ornalastyrylǵan kıberqaýipsizdik jáne jeke derekterdi qorǵaý boıynsha usynystarmen tanysýdy eskertti. 

Sonymen qatar, Kıberqalqan-2 tujyrymdamasy aıasynda kıberqaýipsizdik boıynsha usynystar ázirlendi.

Tsıfrlyq gıgıena – bul jelide qaýipsiz bolýǵa kómektesetin erejeler men nusqaýlar jıyntyǵy. Derekterińizdi qorǵaýǵa kómektesetin birneshe qarapaıym keńester:

1. Kúrdeli qupııa sózderdi paıdalanyńyz jáne ártúrli tirkeýlik jazbalarda birdeı qupııa sózdi paılalanbańyz. Bul sizdiń jeke aqparatyńyzǵa ruqsatsyz kirýdi boldyrmaýǵa kómektesedi.
2. Qurylǵydaǵy baǵdarlamalyq quraldy jańartyp otyryńyz, óıtkeni jańa nusqalarda qaýipsizdik túzetýleri jıi bolady. Bul sizdi yqtımal hakerlik shabýyldardan qorǵaıdy.
3. Kúdikti habarlarǵa jaýap bermeńiz nemese belgisiz jiberýshilerdiń siltemelerin ashpańyz. Bul sizdiń qurylǵyńyzǵa zııandy baǵdarlamanyń ornatylýyna ákelýi múmkin.
4. Vırýstardan jáne basqa qaýipterden qorǵaý úshin antıvırýstyq baǵdarlamalyq quraldy paıdalanyńyz. Bul qurylǵyńyzdy zııandy baǵdarlamalardan qorǵaýǵa kómektesedi.
5. Jeke aqparatyńyzdy beıtanys saıttar men qoldanbalarda engizbeńiz. Jeke aqparatyńyzdy engizbes buryn saıttar men qoldanbalardyń bedelin tekserińiz.
6. Tirkeýlik jazbalardy qorǵaý úshin eki faktorly aýtentıfıkatsııany paıdalanyńyz. Bul sizdiń tirkeýlik jazbalaryńyzǵa ruqsatsyz kirýdi boldyrmaýǵa kómektesedi.
7. Áleýmettik jelilerdegi jáne basqa da onlaın qyzmetterdegi qupııalylyq parametrlerin tekserińiz. Bul sizdiń jeke aqparatyńyz ony bergen adamdar úshin ǵana qoljetimdi bolýyn qamtamasyz etedi.