Zagreb Open týrnırinde qazaqstandyq balýandar qandaı nátıje kórsetti

Horvatııa astanasy Zagreb qalasynda ótken Zagreb Open reıtıngilik týrnırinde qazaqstandyq balýandardyń qalaı óner kórsetkeni belgili boldy, dep habarlaıdy Kazinform. 

Halyqaralyq týrnırde erkin kúresten 1, áıelder kúresinen 3 balýan el namysyn qorǵady. Nátıjesinde olardyń enshisine 1 kúmis medal buıyrdy.

Erkin kúresten Azamat Dáýletbekov (86 keli) fınalǵa deıin jetti. Ol irikteý kezeńinde úndistandyq Depak Fýnııa, ýkraınalyq Valentın Babı, grýzııalyq Evsem Shvelıdzeni jeńdi.

Jartylaı fınalda ızraıldik Fılıp Faınsılberdi 10:0 esebimen aıqyn basymdyqpen jeńse, fınalda Bolgarııanyń namysyn qorǵaıtyn daǵystandyq palýan Magomed Ramazanovtan 5:8 esebimen ese jiberdi.

Al áıelder kúresinen boz kilemge shyqqan Elmıra Syzdyqova (76 keli), Irına Kazıýlına (65 keli), Elena Shalygına (68 keli) júldeden tys qaldy.

El quramasynan Irına Kazıýlınanyń salmaǵynda sportshylar az bolǵandyqtan aınalmaly júıe boıynsha kúresti. Irına 3 beldesýinde germanııalyq Anne Nýernberger, ýkraınalyq Alla Belınska, túrkııalyq Kadrı Aksoıdan jeńilip qaldy.

Al Elena Shalygına men Elmıra Syzdyqova alǵashqy beldesýinde jeńilis tapty. Elena bolgarııalyq Mımı Hrıstovaǵa, Elmıra Syzdyqova AQSh balýany Kennadı Aleksıs Blaıdeske qaýqar kórsete alǵan joq.