Zaǵıptar AstraBus qosymshasyn sóıletýdi surap otyr
ASTANA. QazAqparat - "Astana Expert Club" sarapshylar klýbynyń alǵashqy otyrysynda zaǵıptar qoǵamdyq kólikterdiń qozǵalysyna arnalǵan "Astra Bus" qosymshaǵa dybys shyǵarý qyzmetin engizýdi surady.
Sebebi zaǵıptar ony qoldana almaı júr, dep xabarlaıdy QazAqparat tilshisi.
"Jalpy, búginde Astanadaǵy qoǵamdyq kólik júıesine aqparattyq texnologııalardy engizgende múgedekterdiń quqyqtaryn da barynsha eskergen jón. Oǵan qosa, tıisti talaptar otandyq zańnamada kórsetilgen. Máselen, qazirgi kezde zaǵıptar AstraBus qosymshasyn qoldana almaı júr. Sebebi atalǵan qosymshada dybys shyǵarý qyzmeti qarastyrylmaǵan. Alaıda búginde mátindi dybysqa aınaldyratyn qosymshalar barshylyq. Nege ondaı qyzmetti AstraBus-qa qospasqa? Ony ornatsa, zaǵıptar kele jatqan avtobýstyń nómirin dybys shyǵarý fýnktsııasy arqyly bile alar edi", - deıdi Astana qalasynyń turǵyny Zııat Ábdikárimov. "Astana LRT" kompanııasynyń basshylyǵy atalǵan usynysty qabyldap, ony pysyqtap alýǵa ýáde berdi.
Aıta keteıik, búgin "Nur Otan" partııasynyń qalalyq fılıalynda "Astana Expert Club" sarapshylar klýbynyń alǵashqy otyrysy ótti. Onda qoǵamdyq kólik keshenin damytý máselesi qaraldy. Al fılıal basshysynyń orynbasary Baqyt Saparov sarapshylar klýbyn qurýdyń negizgi maqsaty jaıynda aıtyp berdi. "Máselen, Astana qalasynyń kóliktik keshenin damytýǵa arnalǵan úlken qoǵamdyq tyńdaý uıymdastyrylǵan bolatyn. Oǵan qala turǵyndary, sarapshylar, osy saladaǵy memlekettik organdar men kompanııalardyń ókilderi qatysqan edi. Qoǵamdyq tyńdaýlar barysynda kóptegen máseleler kóterildi, tuşymdy usynystar aıtyldy. Alaıda ákimniń bergen tapsyrmalary men qala turǵyndarynyń usynystaryn oryndaý jumysy iske aspaı qaldy. Sondyqtan osy ispetti sarapshylar klýbyn qurý ıdeıasy týyndady", - deıdi Saparbaev.
