Zaǵıpa Balıeva pedıatrııa fakýltetin jandandyrý úshin kúrespek

ASTANA. QazAqparat - Bala quqyqtary jónindegi ýákil, QR Parlamenti Májilisiniń depýtaty Zaǵıpa Balıeva bilim berý júıesine pedıatrııa ınstıtýtyn jandandyrý boıynsha belsendi jumystar júrgizýde. Bul týraly ol búgin Ortalyq kommýnıkatsııalar qyzmetindegi baspasóz máslıhatynda málim etti.

Medıtsınalyq joǵary oqý oryndarynyń úderisi modernızatsııalanǵanyn eske salyp ótken ol, osy rette pedıatrııa fakýlteti emdeý fakýltetimen biriktirilgenin atap ótti.

Bul turǵyda Qazaqstan Respýblıkasyndaǵy Bala quqyqtary jónindegi ýákil retinde Z. Balıeva osymen kelispeıtinin jetkizdi.

Onyń paıymynsha, dáriger pedıatr bes jyl oqý barysynda eresek adamdy emes, balany emdeýge bilimin shyńdaýy tıis. Kez kelgen pedıatr eresek adamǵa em-dom jasasa da, alaıda terapevt balany emdeı almaıdy. Sebebi, sábıdiń aǵzasy eresek adamnan ózgeshe bolǵandyqtan, bul baǵytta tıisti qadamdar bolýy tıis.

Bul máseleni depýtat Qazaqstan xalqy Assambleıasy respýblıkalyq Analar keńesiniń otyrysynda kóterip, qoldaýǵa ıe boldy. Endi ol bul problemany Úkimetpen jáne medıtsınalyq joǵary oqý oryndarymen talqylamaq.