Zaǵıpa Balıeva Bilim mınıstrine balalardy jaqsy kórýdi úırenýge keńes berdi
ASTANA. QazAqparat - Májilis depýtaty Zaǵıpa Balıeva Bilim jáne ǵylym mınıstrine balalar men muǵalimderdi jaqsy kórýdi úırenýge keńes berdi, dep habarlaıdy QazAqparat.
«Biz balalardy kimge senip tapsyryp otyrmyz? Birinshi kezekte, tárbıeshiler men muǵalimderge. Men búgin mınıstrdiń baıandamasynda kadrlar qalaı daıyndalatyndyǵyn, pedagogıkalyq joǵary oqý oryndaryna túsýde qandaı qyzyǵýshylyq bar ekendigin estımin dep oılaǵan edim. Problemalar tek sanda ǵana emes, sonymen qatar sapada bar. Bul problemany Bilim jáne ǵylym mınıstrligimen biz de birlese sheshýge qosylaıyq. Bilim mınıstri - ol eldegi birinshi muǵalim, osy oraıda mınıstr siz balalar men muǵalimderdi jaqsy kórýdi úırenýińiz kerek», - dedi Balıeva Májilistegi Úkimet saǵatynda.
Depýtattyń paıymynsha, saladaǵy kez kelgen jańashyldyq balalarmen, keıin muǵalimdermen kelisilýi kerek, tek sodan soń ǵana eksperıment júrgizip, engizýge múmkindik bergen jón.
«Bilim jáne ǵylym mınıstrligi óziniń jumysyn qaıta qarap shyǵady dep oılaımyn. Reformalardy at ústi isteýge bolmaıdy. Tez arada birlesken jumys tobyn qurýdy usynamyn», - dedi ol.
Sonymen qatar Balıeva UBT baǵytynda keıbir tustardy jetildirý kerektigin atap ótti.
