Zaǵıpa Balıeva bala ólimine alańdaýly
ASTANA. QazAqparat - Qazaqstanda bala ólimi tómendep keledi. Bul týraly búgin Májiliste Qazaqstannyń Bala quqyqtary jónindegi ýákili Zaǵıpa Balıeva aıtty, dep habarlaıdy QazAqparat tilshisi.
«Qazaqstanda sońǵy 10 jylda balalar arasyndaǵy ólim-jitim statıstıkasynda jalpy tómendeý tendentsııasy bar. Degenmen, jaǵdaı alańdatarlyq. 2008 jyly 10129 bala qaza tapsa, 2017 jyly bul san 5355 balany qurady. ıAǵnı, bala ólimi 2 esege tómendegen. Saraptama tómendeý aýrýdan ólgender sanynyń azaıýy nátıjesinde oryn alǵanyn kórsetti. Al syrtqy sebepterdiń áserinen, jól-kólik apaty, sýǵa ketý, órt, sýıtsıd jáne óltirýden kóz jumǵan balalardyń sany áli de joǵary», - dedi Májilis depýtattary aldynda Qazaqstannyń Bala quqyqtary jónindegi ýákili ótken jyldyń ishinde atqarǵan qyzmetter jaıynda baıandaı kele.
Onyń dereginshe, elimizde jyl saıyn jol-kólik apatynan 200-300 bala kóz jumady. Sońǵy 5 jylda respýblıka aýmaǵyndaǵy sý qoımalaryna 1059 bala batyp ketse, órtten 227 bala qaza bolǵan. Jyl saıyn balalar kisi qolynan da qaza tabady. Máselen, 2017 jyly elimizde 26 bala ólgen.
«Jyl saıyn sýıtsıdtiń saldarynan balalardy joǵaltýdamyz. Degenmen, sýıtsıd boıynsha tómendeý de bar. Eger 2013 jyly 200 bala ózine qol jumsasa, 2017 jyly 136 bala sýıtsıd jasady. Neni durys jasamaı otyrmyz? Memlekettik sharalar nelikten tolyqtaı qanaǵattanarlyq nátıje ákelmeıdi. Beıbit ómirde, soǵyssyz, snarıadtar men oq atýsyz balalardyń ólimi oryn alady. Eń qorqynyshtysy, balalar týǵan-týystarynyń, jaqyndarynyń ortasynda, aýrýhanada, mektepte, aýlada kóz jumady. Bul aýmaqtar qaýipsiz, jaıly jáne qorǵalǵan bolýy tıis», - dedi balalar ombýdsmeni.
Osy rette ol balalardyń zorlyq-zombylyqqa ushyraý prblemasy búkil álemde ótkir turǵanymen kóleńkede qalyp otyr. Sebebi muny barlyǵy birdeı jarııa jáne ashyq túrde aıta bermeıdi.
«Qazaqstan bul jaıynda jarııa, ashyq túrde aıtyp, barlyq sharalardy qabyldaýda. Sol úshin de joǵary baǵa alyp otyrmyz. Biraq, bul úshin joǵary baǵa alǵymyz kelmeıdi. Elinde 2015 jyly joldarda, aýrýhanalarda birde bir bala ólmegen, birde bir bala zorlyq-zombylyqqa ushyramaǵan Norvegııa sııaqty joǵary baǵa alǵanyn qalaımyn», - dedi Zaǵıpa Balıeva.
