Zaǵıpa Balıeva Almatyda qoqys jáshiginen tabylǵan balaǵa qatysty aqparatpen bólisti
ALMATY. QazAqparat - Májilis depýtaty, Bala quqyǵy jónindegi ýákil Zaǵıpa Balıeva Almatyda qoqys jáshiginen tabylǵan balaǵa qatysty is boıynsha tergeý amaldary júrgizilip jatqanyn aıtty, dep habarlaıdy «QazAqparat» tilshisi.
«Balanyń sheshesi - Almatydaǵy joǵarǵy oqý oryndarynyń biriniń 2-shi kýrs stýdenti. 1998 jyly týǵan. Balanyń qaýipsizdigin saqtamaǵany úshin QR QK 119-baby boıynsha stýdent qyzǵa qatysty qylmystyq is qozǵaldy. Ázirge tergeý amaldary júrgizilip jatyr. Birqatar saraptama taǵaıyndalyp, onyń nege muny jasaǵany, ne úshin mundaı qadamǵa barǵany anyqtalady. Menińshe, tergeý amaldarynyń sheshimin kútý kerek», - dedi Zaǵıpa Balıeva.
Onyń aıtýynsha, stýdent keshe aýrýhanadan shyqty. Oǵan psıhologııalyq kómek kórsetiledi.
«Biz qazir Shymkent qalasy men OQO Saıram aýdany boıynsha osyndaı eki anaǵa izdeý jarııaladyq. Olarǵa da QR QK 119-baby boıynsha qylmystyq is qozǵalǵan. Sonymen qatar, kámpıt urlaǵan 3 jasar balany «urlyq istedi» dep, sabap óltirgen jaǵdaıǵa qatysty is te bizdiń baqylaýymyzda. Men, jalpy, jaza men jaýapkershilikti kúsheıtýdi qoldaımyn, degenmen bul júıeli túrde sheshetin tárbıe máselesi», - dedi Zaǵıpa Balıeva.
Eske sala keteıik, buǵan deıin BAQ betterinde Almaty qalasyndaǵy Baıtursynov jáne Tóle bı kósheleri qıylysynda ornalasqan joǵarǵy oqý oryndarynyń biriniń jataqhanasyndaǵy qoqys jáshiginen náreste tabylǵany týraly habarlanǵan bolatyn. Kóp uzamaı balanyń sheshesi sol jataqhanadan tabyldy.
