Zaǵıpa Balıeva ákimnen soqqy jegen balanyń halin bilý úshin aýrýhanaǵa bardy

ASTANA. QazAqparat - Qazaqstandaǵy Bala quqyqtary jónindegi ýákil, Parlament Májilisiniń depýtaty Zaǵıpa Balıeva Qorǵaljyn aýdanynda aýyl ákiminen soqqy jegen balanyń jaǵdaıyn bilý úshin Astanadaǵy aýrýhanaǵa bardy, dep habarlaıdy «QazAqparat» HAA tilshisi.

Zaǵıpa Balıeva Astana qalasyndaǵy №2 aýrýhanaǵa baryp, Dıas Muqannyń densaýlyq jaǵdaıyn bildi. Budan keıin ol BAQ ókilderine atalǵan jaǵdaı boıynsha pikir bildirdi.

«Qorǵaljyn aýdanynda bolǵan jaǵdaıǵa ókil retinde kóńil bólemin. Qazirgi tańda quqyq qorǵaý organdaryna tıisti qujattardy jiberdim. Ákimniń isi Tártiptik keńeste mindetti túrde qaralady. Jaýapqa tartylady», - dedi májilismen.

Zaǵıpa Balıevanyń aıtýynsha, oryn alǵan jaǵdaıdy eki aspekt boıynsha qaraýǵa bolady.

«Birinshiden, nege balalar tóbelesedi? Ekinshiden, nege balaǵa qol jumsaıdy? Aldymen, búkil bilim basqarmasynyń ókilderi jınalyp, mektepke osyndaı jaǵdaıdyń tirkelýine ne sebep bolǵany anyqtalady. Mektepte birinshiden ata-analarmen, balalardyń ózimen de jumys júrgizilýi kerek. Ókil retinde balalar quqyqtary týraly kitap daıyndadym. Elimizde 7414 mektep bar. Solardyń bárine taratylady», - deıdi ol.

Parlament depýtaty sonymen birge balalar ózderiniń quqyqtaryn bilýge mindetti ekenin atap ótti.

«Bala óziniń quqyǵyn qorǵap, basqa balanyń quqyǵyn da saqtaý kerek. Bul birinshiden. Ekinshiden, Dıastyń anasy qazir aryz jazdy. Sol boıynsha qylmystyq is qozǵaldy. Tıisti is-sharalar jasaldy. Qorytyndysyn kútemiz», - dedi ol.

Zaǵıpa Balıeva aýyl ákimi mindetti túrde jaýapqa tartylatynyn tilge tıek etti.

«QR QK-niń 107- baby boıynsha qylmystyq is qozǵaldy. Dárigerler óziniń qorytyndysyn aıtady. Ol qylmystyq kodeks boıynsha jaýapqa tartylady. Ókil retinde ózim osy jerge talaı kelip júrmin. Dıastyń da jaǵdaıyn bilip otyramyz. Qajetti kómek kerek bolsa, kórsetemiz. Balaǵa qol jumsaýǵa eshkimniń qaqysy joq. Ata-anasy, aǵalary bolsyn, kórshileri men muǵalimderi bolsyn, ákim bolsyn - kim bolsa da qaqysy joq», - dedi ol.

Eske sala keteıik, Qorǵaljyn aýdanynyń turǵyny Aıgúl Bekjanova Feısbýk áleýmettik jelisine A.Tóleýbaev atyndaǵy orta mektepte oqıtyn uly, 8-synyp oqýshysy Dıas Muqandy Qorǵaljyn aýyldyq okrýginiń ákimi Janat Omarov soqqyǵa jyqandyǵy týraly jazǵan bolatyn. Onda zardap shekken balanyń anasy ulynyń «mıdyń shaıqalýy» dıagnozymen Qorǵaljyn aýdandyq aýrhanasyna, keıin Astana qalasyndaǵy №2 aýrýhanasyna jetkizilgenin aıtqan edi.

Qazirgi ýaqytta QR QK 107-baby 2-bóligi boıynsha sotqa deıingi tergeý júrgizilip jatyr.  Sondaı-aq búgin Aqmola oblystyq ІІD-den habarlaǵandaı, is boıynsha sot-medıtsınalyq saraptama taǵaıyndaldy. 

Al Aqmola oblysynyń ákimi Málik Myrzalın aýyl ákiminiń bul isi Ádep jónindegi keńeste qaralatynyn aıtty. 


Foto: lechim-serdce.ru