Zaǵıpa Balıeva: 7 jastaǵy balany zorlady degen kúdikke ilingender de memleket qorǵaýynda
ASTANA. QazAqparat - Ońtústik Qazaqstan oblysynda 7 jastaǵy balany zorlaý kúdigine ilikken oqýshylar da memleket qorǵaýynda. Bul týraly búgin Ortalyq kommýnıkatsııalar qyzmetindegi brıfıngte QR Bala quqyqtary jónindegi ýákili Zaǵıpa Balıeva aıtty, dep habarlaıdy QazAqparat.
Brıfıng barysynda ol tek 7 jastaǵy balamen ǵana baılanysqanyn, al kúdiktilermen áli kezdespegenin basa aıtty.
«Saraptama taǵaıyndalǵanyn, barlyq balalar memlekettiń qorǵaýyna alynǵanyn bilemin. Atalǵan qylmystyq jasaý kúdigine ilikkender de balalar. Olar da memlekettik qorǵaýynda», - dedi ol.
Bala quqyqtary jónindegi ýákildiń aıtýynsha, kúdiktiler mektepke baryp júr.
«Olarǵa da osy baǵdarlama boıynsha psıhologııalyq kómek kórsetý qajet. Tóńiregindegiler de olarǵa osy sebepterge baılanysty suraqtar qoıyp, túrtpekteıdi. Men barlyq tarapty, barlyq balalardy, onyń ishinde zańmen problemasy bar, belgili bir shekten shyǵyp ketken balalardy da qorǵaýǵa mindettimin. Men úshin bóten bala jáne jumys istemeýim qajet bala joq», - dedi Zaǵıpa Balıeva.
Buǵan deıin habarlaǵanymyzdaı, Zaǵıpa Balıeva 7 jasar balaǵa keshendi ári tolyqqandy saraptama júrgizý qajettigin aıtqan bolatyn.
Sonymen qatar ol bala otbasynyń áleýmettik mártebesi týraly da sóz qozǵaǵan edi.
