Zaǵıp jandarǵa arnalǵan uıaly telefondar qaıtarylady
QYZYLORDA. QazAqparat - Qyzylordada zaǵıp jandarǵa arnap oblystyq bıýdjet esebinen satyp alynǵan uıaly telefondar keıin qaıtaryldy, dep habarlaıdy QazAqparat tilshisi. Bul derekti oblystyq jumyspen qamtýdy úılestirý jáne áleýmettik baǵdarlamalar basqarmasynyń bastyǵy Talǵat Dúısebaev rastady.
Mamandardyń aıtýynsha, tehnıkalyq erekshelikterge sáıkes kórý qabileti tómen azamattarǵa arnalǵan telefondarda mindetti túrde sóıleý sıntezi ornatylýy tıis. Ókinishke oraı, Syr óńirindegi zaǵıptarǵa berilgen baılanys quraldarynda mundaı júıe bolmaǵan. Jalpy, ónim berýshimen 2 táýlik ishinde árbir telefon ashylyp, ǵalamtorǵa qosylǵan SIM-karta salynyp, sóıleý sıntezi ornatylyp, jetkizilgen edi. Degenmen, telefondy paıdalaný barysynda aqaýlyq baıqalǵan. Sonyń saldarynan ol jaramsyz dep eseptelgen. Bul jaıynda birinshi top múgedegi Altyngúl Sydyqova «Uıaly telefon ótken jyldyń jeltoqsan aıynda bizderge taratylyp berilgen edi. Alaıda, ony paıdalana alǵan joqpyz. Aýktsıonda jeńimpaz bolǵan ónim berýshi tarapynan osyndaı olqylyqtyń oryn alǵany ókinishti» deıdi.
Osylaısha keri qaıtarylǵan 135 telefonnyń 103-i jaramsyz dep tanylǵan. Ústimizdegi jyldyń 12 naýryzynda «Grand» jeke kásipkeriniń «5 element» servıs ortalyǵymen telefondardyń sapasy men jaramdylyǵyna saraptamalyq qorytyndy berý maqsatynda kelisim-shart jasaldy.
«Atalmysh servıs ortalyǵynan árbir telefonnyń sapasy men jaramdylyǵyna qorytyndy alynady. Sodan keıin sot organdaryna talap aryz joldanady.
Aıta ketelik, bul dúnıeler - bizdiń basqarma tarapynan zaǵıp jandarǵa berilip otyrǵan alǵashqy telefondar. Keleshekte mundaı olqylyqqa jol bermeýge nazar aýdaryp otyrmyz. Sol maqsatta qurylatyn komıssııa quramyna múgedekter, zaǵıp jandardan ókilder engizýdi kózdep otyrmyz» dedi basqarma basshysy T.Dúısebaev.
Basqarma basshysynyń aıtýynsha, 2017 jyldyń shilde aıynda árbir danasy 125 myń teńge turatyn 160 tıflotehnıkalyq qural-dybyspen habar beretin jáne dıktofony bar utqyr telefondy satyp alýǵa oblystyq bıýdjetten 20 mln teńge qaralǵan.
«Bul maqsatta ótken aýktsıonǵa barlyǵy 8 ónim berýshi qatysty. 2017 jylǵy hattamaǵa sáıkes ár telefonnyń baǵasy 33,5 myń teńgeden belgilendi. Sonyń nátıjesinde 160 dana telefon 5,3 ml. teńgeni qurady. Jeńimpaz retinde «Sańyraýlardyń qazaq qoǵamy» qoǵamdyq birlestiginiń «Qyzylorda oqý-óndiristik kásiporny mekemesi jeńimpaz dep tanylǵan edi. Únemdelgen 14 mln teńgeden astam qarjy bıýdjetke qaıtarylǵan» dedi T.Dúısebaev.
Ádilet Qańtarbaev
