Zaǵıp jandar úshin dabyl belgisi bar, transformer taıaqtar qurastyryldy
ASTANA. QazAqparat - Qaraǵandyda «TOM:Qazaqstan» meıkatonynyń ekinshi kezeńi ótti. 72 caǵattyq marafon barysynda jas ónertapqyshtar múmkindigi shekteýli jandardyń ómirine qajetti qurylǵylardy oılap tabýmen jáne ony qurastyrýmen aınalysty, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Bul - Qazaqstanda ónertapqyshtar arasynda ótken ekinshi baıqaý. Birinshi meıkaton osy jyldyń jazynda Pavlodar qalasynda uıymdastyryldy. Onda tirek-qımyl apparaty buzylǵan jandarǵa arnalǵan ekzoskelet oılap tapqan qaraǵandylyq komanda jeńiske jetken edi.
Qaraǵandy memlekettik medıtsınalyq ýnıversıtetiniń sporttyq zaly úsh kúnge zerthanaǵa aınaldy - munda ónertapqyshtar óz ıdeıalaryn júzege asyrdy. Baıqaýǵa 10 top qatysty - meıkerler Almaty, Taldyqorǵan, Atyraý, Pavlodar, Qaraǵandydan jınaldy. Árbir komandanyń ózindik nıdnoýery (múmkindigi shekteýli adam) boldy, onyń naqty qıyndyǵyn sheshý kerek edi. Bul 10 adamnyń barlyǵy - qaraǵandylyqtar, olardy irikteý jergilikti túrde ótkizildi. 
Baıqaý nátıjesinde 10 «aqyldy» joba paıda boldy: ekzoskeletter, jańǵyrtylǵan qol taıaqtary, múgedekter arbasyn baspaldaqtan kóterip-túsirýge arnalǵan ámbebap qurylǵy. Sondaı-aq pedaldary qolmen aınaldyrylatyn velosıped - hendbaık qurastyryldy. Qaraǵandylyq komanda ony sal aýrýyna shaldyqqan jigittiń ótinishi boıynsha kóshede baldaqsyz júrý úshin qurastyryp shyǵardy.
Qazaqstandyq ónertapqyshtarǵa Izraılden kelgen sarapshy kómektesti. Aleks Geht óndiristik dızaıner bolyp jumys isteıdi - ol álemniń birneshe elderinde osy sekildi baıqaýlarda bolyp qaıtqan. Sheteldik mamannyń aıtýynsha, meıkatonǵa qatysýshylar alǵa qoıylǵan maqsatty sátti oryndap shyqty - paıdalanýǵa ońaı ári qarapaıym, ózindik quny tómen qyzyqty jobalar usynyldy. Osynyń arqasynda prototıpterdi ónerkásiptik óndiriske engizýge bolady.
Ónertabystyń birin «Lých» neıro ońaltý ortalyǵy ózine aldy. Olardyń alańynda sal aýrýyna shaldyqqan jáne tirek-qımyl apparaty buzylǵan adamdarǵa arnalǵan trenajer ornatyldy. Qurylǵy adamnyń qozǵalý qabiletin damytyp, qorqynysh sezimin jeńýge kómektesedi.
Qazylar alqasyna úzdik jobany tańdaý qıynǵa soqty.
«Búgin sizderdiń barlyqtaryńyz jeńimpazsyzdar. Bir adamǵa belgili bir problemasyn jeńýge kómektesý - álemdi ózgertýmen birdeı», - dedi «QR-daǵy Tel-Avıv ýnıversıtetiniń dostar qaýymdastyǵy» zańdy tulǵalar birlestiginiń vıtse-prezıdenti Sánııa Arapova.
Talqylaýdan soń birinshi oryn Almaty, Qaraǵandy jáne Pavlodardan kelgen mamandar men stýdentterden quralǵan «Re:Born» qurama komandasyna berildi. Olar zaǵıptarǵa arnalǵan fýnktsıonaldy qol taıaǵyn oılap shyǵardy. Taıaq shuńqyr, shalshyq sý nemese bógetterge dybys beretin datchıkpen jabdyqtalǵan.
Mundaı súıenishtiń prototıpi 5-6 myń teńgege deıin barady. Osy sekildi sheteldik balama qurylǵylardyń quny shamamen 300 AQSh dollaryn quraıdy.
Qaraǵandy memlekettik medıtsınalyq ýnıversıtetiniń arnaıy syılyǵy stýdenttermen jáne ustazdarmen qosa oqýshylar da jumys istegen «Jetisý» komandasyna (Taldyqorǵan jáne Pavlodar) berildi. Olar kórý múmkindigi shekteýli jandarǵa arnalǵan transformer qol taıaǵyn usyndy.
Meıkaton TOM (TikkunOlamMakers) - bul paıdalanýǵa yńǵaıly gadjetterdi oılap taýyp, jasaý úshin múmkindigi shekteýli jandar men ónertapqyshtardyń basyn biriktiretin halyqaralyq áleýmettik joba. Saıystar 2014 jyldan beri Izraıl, AQSh, Ulybrıtanııa, Avstrııa jáne basqa da elderde ótkizilip keledi.
