Zaǵıp jandar fýtbol komandasy halyqaralyq arenaǵa shyqpaq
ASTANA. QazAqparat - Búginde zaǵıp jandardan quralǵan «Blind football Team» atty fýtbol komandasy qyzý daıyndyq ústinde, dep habarlaıdy QazAqparat tilshisi.
«Bizdiń fýtbol komandamyz ótken jyldyń qyrkúıek aıynda Almatydaǵy «Qaırat» fýtbol klýbynyń bazasynda quryldy. Bul fýtbol túriniń erejesi boıynsha komanda eki quramda 5\5 oıynshydan turady. Qazirgi kúni 12 oıynshy bar olardyń 80% kózi tolyǵymen kórmeıdi», - deıdi Qazaqstandaǵy «Blind football» jobasynyń úılestirýshisi Shyńǵys Temirhanov.
Onyń aıtýynsha, «Blind football Team» ázirge jalǵyz komanda bolǵandyqtan ol klýbtyq jáne ulttyq qurama deńgeıinde teńdeı oınaıdy.
«Komanda quramyna kirý úshin fýtbol oıynyna degen erekshe yntadan bólek, sportshynyń jaqsy fızıkalyq daıyndyǵy bolýy tıis. Ótken jyldyń qarasha aıynda ÝEFA jáne IBSA uıymdarynyń qoldaýymen jattyqtyrýshy, gıd, psıholog jáne qyzmet kórsetýshi mamandarǵa arnalǵan oqytý kýrsy uıymdastyryldy. Búgingi tańda fýtbol komandasyn jetildirý jáne nasıhattaý jumystaryn belsendi júrgizýdemiz», - dedi ol.
Qazirgi ýaqytta fýtbolshylar ústimizdegi jyldyń mamyr aıynda ótetin Reseı kýbogy men Azııa chempıonatyna qyzý daıyndyq ústinde. Odan bólek, 2020 jyly Tokıoda ótetin paralımpıadalyq oıynǵa joldama alýǵa qatysý da josparda bar.
«Blind football»-dyń erejesi boıynsha komanda quramynda 5 adam oınaıdy, onyń tórteýi zaǵıp jandar, besinshisi qorǵaýshy, ol kózi kóretin oıynshy bolýy shart. Sonymen qatar, qajet jaǵdaıda oıynshylar aýysa alady jáne bir oıyn 20-25 mınýtqa sozylady. Taǵy bir aıta keterligi, fýtbol oınaıtyn 4 oıynshyǵa arnaıy kózildirik beriledi. Onyń eki maqsaty bar, birinshi qorǵaý quraly retinde, ekinshiden ádildik úshin. Óıtkeni, ár oıynshynyń kórý deńgeıi ártúrli, ıaǵnı bireýler ortasha, al bireýler tómen deńgeıde kóredi, al kózildirikten eshteńe kórinbeıdi. Odan bólek, oıynshylarǵa jón siltep turatyn arnaıy gıd mamandary bar, olar qaqpanyń qasynda turady jáne oıyn alańynyń eki jaq shetinde jattyqtyrýshylary turady, olardyń óz oıynshylaryna jón silteýge quqyqtary bar», -deıdi Sh.Temirhanov.
Aıta ketsek, zaǵıp jandarǵa arnalǵan «Blind football» sport túrinen alǵash ret álem chempıonaty 1986 jyly Ispanııada ótti, al 2004 jyldan bastap atalǵan fýtbol túri paralımpıada oıyndarynyń tizimine engizildi.
