Zaǵıp balalardan quralǵan «Sát» toby kontsertterine shaqyrady
ASTANA. QazAqparat - Ústimizdegi jyldyń 7 qazany kúni Astanadaǵy Beıbitshilik jáne kelisim saraıynda «Sát» tobynyń «Ómirge ǵashyqpyn» atty án keshi ótedi.
Kesh qonaqtary Ashat Tarǵyn, Marjan Arapbaeva jáne taǵy da basqa el juldyzdary.
«Sát» tobyn bilmeıtin jan kemde-kem shyǵar. Shymkenttik «Sát» toby buryn Azat, Turar, Saparbaı esimdi kóz janarlarynan aıyrylǵan jigitterden quralǵan trıo edi. Úsh bala da «Úmit» mektep-ınternatynda kishkentaıynan birge ósken. Olardyń alǵash úlken sahnada aıtqan, keıin klıp bolyp túsirilgen Muqaǵalı Maqataevtyń «Kónemiz ǵoı» óleńine jazylǵan ánderi barsha qazaq jurtynyń júregin eljiretip, kózderine jas toltyratyn. Búginde olar óz aldaryna otaý quratyn jasta. Trıodaǵy Turar ónerdegi jolyn ýaqytsha toqtatýǵa sheshim qabyldaǵandyqtan «Sát» endigide dýet boldy.
Aıta keteıik, «Sát» toby qurylǵaly beri talaı júldeni enshiledi, talaı eldi tańdaı qaqtyryp úlgerdi. Júldeler tizbegi 2008 jyly Astanada ótken respýblıkalyq baıqaýdan bastalǵan. Keıin Sankt-Peterbor qalasynda 11 memlekettiń ánshisi saıysqan baıqaýda úzdik atandy. 2009, 2011 jyldary «Samǵaý» ulttyq syılyǵynyń ıesi, 2011 jyly «Eń úzdik oryndaýshy» ataǵyna laıyq dep tanylǵan.
Sondaı-aq RF Eńbek sińirgen ártisi Dıana Gýrtskaıanyń uıymdastyrýymen ótken «Belaıa trost.Bez granıts» atty zaǵıp balalardyń halyqaralyq qaıyrymdylyq festıvalinde «Sáttiń» jigitteri tamasha óner kórsetip, Máskeý sahnasynda Larısa Dolına, Igor Nıkolaev, Dmıtrıı Malıkovtarmen birge án shyrqady.
