Əz-Naýryz - Almatyda (FOTO)

ALMATY. QazAqparat - Almatylyqtar Ulystyń uly kúnin toılaýda. Bıyl mereke Qazaqstan respýblıkasynyń təýelsizdigine 25 jyl tolýyna əri Almatynyń 1000 jyldyǵy taqyrybymen ótip jatyr.

Qala turǵyndary men qonaqtaryn əkim Baýyrjan Baıbek quttyqtady. "Əz naýryz - halqymyz ulystyń uly kúni dep qurmetpen qaraıtyn jyl basy ǵana emes, izgilik pen berekeniń meıramy. Jýannyń jińishkerip, jińishkeniń úziletin, jańa armannyń, jańa úmittiń bastaýy. Bıylǵy meıramda Almatynyń myńjyldyǵy keńinen atalyp ótip jatyr. Elbasy Qazaqstannyń jańa jahandyq joldaǵy ósim men reforma dep atalatyn Joldaýymen almatylyqtar bıyl úlken jetistiktermen qarsy alýda. Myńjyldyǵy atalyp ótip jatqan qala úlesine el ekonomıkasynyń besten biri tıesili. Osynyń ózi qalamyzdyń el damýyndaǵy rólin kórsetedi. Bıyl BUU arnaıy mədenıet jəne bilim komıssııasy Almatymyzdyń myńjyldyǵyn toılaýdy bekitti. Myńjyldyq tarıhy bar qalamyzdyń əli de alynbaǵan asýlary bar. Oǵan jetý úshin bizde bar múmkindik jetkilikti. Olardyń barlyǵy Almatynyń 2020 jylǵa deıingi damý baǵdarlamasynda kórsetilgen", -dedi ol.
Aıta ketý kerek, Astana alańyna 20 000 adam jınaldy. Kelýshilerge arnap Naýryz teatrlandyrylǵan qoıylymy, ulttyq buıymdar kórmesi jaıylyp kıiz úıler tigilgen. Kóshede qazaqtyń ulttyq ertegileri keıipkerleriniń qýyrshaq beıneleri júr. Sondaı-aq, qazaq memlekettik mýzeıi Almaty qalashyǵynan tabylǵan tarıhı jədigerlerdi kórmege qoıdy.
Kórmeni tamashalaýshylarda esep joq. Onymen qatar, turǵyndar túrli sheberlik klastaryna qatysyp, Ózbekstannan kelgen arqanmen júretin akrobattardyń, Qazaq memlekettik tsırkiniń ərtisteriniń ónerin tamashalaýda. Qazaq estradasynyń juldyzdary qalyń jurtqa ən men kúıden shashý shashty. Jınalǵan qaýym tigilgen kıiz úılerge kirip, ulttyq taǵamdardan dəm tatýda.