Z-býyn elektoraldyq mashyqtaryn áli kórsetken joq – Talǵat Qalıev

ASTANA. QazAqparat – Qoldanbaly etnosaıası zertteýler ınstıtýtynyń dırektory Talǵat Qalıev Qazaqstan telearnasy ótkizip jatqan onlaın telemarafonda kezekten tys saılaýǵa jeke mandattan túsip jatqan kandıdattar depýtat bolyp saılansa, neni ózgerte alatyny týraly paıymyn aıtty, dep habarlaıdy QazAqparat tilshisi.

«Birinshiden, olar depýtattardyń úırenshikti áreketterin ózgertedi. Buǵan deıingi depýtattar «sappen júrip-turdy» deýge bolatyn shyǵar. Óıtkeni olar tolyqtaı partııa tártibine, fraktsııa reglamentterine baǵynyshty edi. Ár málimdemesin maquldatyp otyrdy. Bul endi fakt. Búkil álemde sondaı tártip bar», - dedi sarapshy.

Onyń aıtýynsha, táýelsiz kandıdattar Májilis pen máslıhattaǵy talqylaýlardy ótkir ete túsýi kerek.

«Táýelsiz kandıdattardy shekteıtin eshteńe joq. Olardyń daýys berýshiler aldynda ǵana mindettemeleri bar. Sondyqtan olar «janr kósemi» bolady. Halyq nazary úshin baryn salady. Kún tártibindegi máseleni paıdalanyp, kez kelgen oqıǵaǵa baılanysty ózgelerden buryn áreket etýge talpynady. Málimdemelerin ózgelerden qattyraq, aıqynyraq bildirýge tyrysady. Fraktsııadaǵy depýtattar da solardyń qarqynyna ilesip, belsendilikterin arttyrýǵa májbúr bolady», - dedi Talǵat Qalıev.

Sondaı-aq, ol daýys berýshilerdiń túske deıingi kelý kórsetkishi nege tómen bolǵany týraly paıymyn aıtty.

«Bizdegi daýys berýge qulyqty azamattardyń ortasha jasy – 31 jastyń aınalasynda. Jastar býyny árdaıym daýys berýde belsendi emes. Qazirgi Z-býyn qalaı bolatyny belgisiz. Olar elektoraldyq mashyqtaryn kórsetip úlgergen joq. Bir mandattan túsetin kandıdattar, jańa partııalar olardy belsendilendire aldy ma, óz orbıtalaryna tarta aldy ma, jastarmen durys jumys uıymdastyra aldy ma — másele osyda. Jalpy búkil álemde jastar daýys berýge sylbyr qatysady», - dedi Qoldanbaly etnosaıası zertteýler ınstıtýtynyń dırektory.