Yzǵarly antıtsıklon áseri áli de saqtalmaq
ASTANA. 22 aqpan. QazAqparat - «Qazgıdromet» aýa raıynyń qaýipti ári mańyzdy gıdrometeorologııalyq qubylystarynyń 2011 jyldyń 23 aqpanyna arnalǵan boljamyna sáıkes
yzǵarly antıtsıklonnyń áseri áli de Qazaqstannyń birqatar oblystarynda saqtalatyndyǵyn aıtady jáne respýblıkanyń ońtústik aýdandarynda qar, tuman, kóktaıǵaq bolatyndyǵyn eskertedi.
Almaty, Jambyl oblystarynyń keı jerlerinde tuman túsedi, kóktaıǵaq bolyp, jel 17-22 m/s jyldamdyqpen soǵady, al Jambyl oblysynyń taýly bókterlerinde jel 25 m/s-qa deıin kúsheımek. Qyzylorda, Pavlodar, Aqtóbe, Qostanaı oblystarynyń keı óńirlerinde tuman túsedi dep kútilýde. Mańǵystaý oblysynyń keı jerlerinde boran soǵyp, jel jyldamdyǵy 15-20m/s bolady dep boljanǵan.
Aqtóbe, Atyraý oblystarynda túnde 31-38 gradýstyq aıaz saqtalady. Mańǵystaý oblysynda aıaz 23-28 gradýsqa deıin kúsheıedi.
Gıdrologııalyq boljamǵa saı jýyq aradaǵy táýlikte Ońtústik Qazaqstan, Jambyl, Almaty oblystarynyń alasa taýly aımaqtaryndaǵy ózenderde sý deńgeıiniń aýytqýy baıqalýy yqtımal. Respýblıkanyń soltústik bóligindegi ózenderde (Jaıyq, Esil, Nura, Ertis, t.b.) qysqy qalypty jaǵdaı saqtalady.
