Yzaqor mysyq óz ıesin «tutqynda» ustady
ASTANA. QazAqparat - Amerıkandyq Oregon shtatynda salmaǵy 10 kelige jýyq ashýly mysyq nárestege shabýyldap, úı ıelerin «tutqynǵa» aldy.
Bul oqıǵa Portlend qalasynda oryn aldy. Gımalaı tuqymyna jatatyn qarala mysyq jeti aılyq sábıge bassalyp, betin tyrnap tastaǵan. Buny kórgen náresteniń ákesi janýardy teýip jibergen, alaıda mysyq odan beter yzalanyp, úıdegi eresek adamdarǵa tisin batyrýǵa talpynǵan. Mysyqtyń ashýynan qaımyqqan otbasy músheleri men úıdegi ıt jeke bólmede bas saýǵalaýǵa májbúr boldy.
Mysyq óz kezeginde bólme esiginiń aldyna jaıǵasyp alyp, eshkimdi shyǵarmaı kúzetip otyrǵan. Budan keıin úı ıeleri polıtsııanyń kómegine júginip, olar janýardy shaǵyn temir torǵa qamaýǵa aldy. Ázirge yzaqor mysyq úı ıeleriniń qolynda, dep habarlaıdy Rosbalt.
