ıÝrıı Gagarınniń ushqanyna 65 jyl: Prezıdenttik ortalyqta ǵarysh jádigerleri tanystyryldy
ASTANA. KAZINFORM – Astanadaǵy Prezıdenttik ortalyqta adamzattyń ǵaryshqa alǵashqy qadamy – ıÝrıı Gagarınniń saparyna 65 jyl tolýyna arnalǵan «Ǵarysh álemi» atty aýqymdy kórme ashyldy. Sharada qazaq ǵaryshkerleri paıdalanǵan biregeı jádigerler men qundy arhıvtik qujattar kópshilik nazaryna usynyldy.
Kórmeniń basty maqsaty – ǵarysh salasynyń damý evolıýtsııasyn kórsetý jáne Qazaqstannyń álemdik kosmonavtıkadaǵy tarıhı rólin aıshyqtaý.
Ekspozıtsııaǵa 30-ǵa jýyq sırek kezdesetin eksponat pen 60-tan astam arhıvtik materıal qoıylǵan. Olardyń arasynda Reseıdiń Ǵarysh mýzeıi men Baıqońyr ǵarysh aılaǵy mýzeıinen ákelingen qundy jádigerler bar.
Prezıdenttik ortalyqtyń kórmelerdi uıymdastyrý qyzmetiniń jetekshisi Jibek Júzenovanyń aıtýynsha, kórmege qoıylǵan árbir zattyń tarıhı mańyzy zor.
– Munda ǵaryshta bolyp qaıtqan Talǵat Musabaev pen Aıdyn Aıymbetovtiń týlary, Toqtar Áýbákirovtiń ushý kostıými men qolǵaby qoıylǵan. Erekshe toqtalyp ótetin jádiger – Talǵat Musabaev alǵash ǵaryshqa ushqanda ózimen birge alyp barǵan Quran kitaby men Baıqońyr jeriniń kapsýlasy. Sondaı-aq 2015 jyly Qazaq handyǵynyń 550 jyldyǵynda Halyqaralyq ǵarysh stantsııasyna jetkizilgen arnaıy móri bar tý da kelýshilerdiń qyzyǵýshylyǵyna bólendi, – deıdi Jibek Júzenova.
Kórmeniń ashylýyna Kazinform agenttiginiń tilshisi, Baıqońyrdyń qurmetti azamaty, ǵarysh salasynyń jylnamashysy Sara Nurǵalıeva arnaıy qatysyp, Prezıdenttik ortalyqtyń qoryna óz kitaptaryn tartý etti. 33 jyl ǵumyryn Baıqońyrda ótkizgen jýrnalıst qazaq ǵaryshkerleriniń alǵashqy saparyn eske aldy.
– 1991 jyldyń tamyzynda, Keńes Odaǵy ydyrap jatqan tusta Baıqońyr Qazaqstannyń menshigine ótti. Biz Táýelsizdik deklaratsııasyn jeltoqsanda qabyldadyq, al Toqtar Áýbákirov qazan aıynda ǵaryshqa ushty. Biz Táýelsizdikti jerden buryn ǵaryshta alǵandaı boldyq. Búginde Baıqońyr – Qazaqstannyń brendi, – dedi Sara Nurǵalıeva.
Aıta keteıik, buǵan deıin 2029 jyly «KazSat-3» spýtnıgin almastyratyn jerserik ǵaryshqa ushatynyn habarlaǵan edik.
