ıÝNISEF Qazaqstannyń bala quqyqtaryn qorǵaý tetikterin joǵary baǵalady
ASTANA. KAZINFORM – Memlekettik keńesshi Erlan Qarın Almatyda BUU Balalar qorynyń (ıÝNISEF) Eýropa jáne Ortalyq Azııa boıynsha aımaqtyq dırektory Redjına De Domınıchıspen kezdesti. Bul týraly Aqordanyń baspasóz qyzmeti habarlady.
Erlan Qarın balalardy qorǵaý jáne olardyń qaýipsizdigin saqtaý memlekettik saıasattyń basym baǵyty ekenin ári bul másele el Prezıdentiniń jiti nazarynda turǵanyn atap ótti. Sonymen qatar Qazaqstanda balalar quqyǵyn qorǵaýdyń zańnamalyq jáne ınstıtýtsıonaldyq negizderi qalyptasqanyn aıtty.
Máselen, áıelderdiń quqyqtary men balalardyń qaýipsizdigin qamtamasyz etetin zań qabyldandy. Zańǵa sáıkes býllıng úshin jaýapkershilik engizilip, zorlyq-zombylyqtyń barlyq túrine qatysty jaza kúsheıtildi. Qabyldanǵan sharalardyń nátıjesinde balalarǵa qatysty asa aýyr qylmystar 30 paıyzǵa, al balalar men jasóspirimderdi jynystyq qatynasqa túsýge májbúrleý qylmystary 12,5 paıyzǵa azaıdy.
Sondaı-aq balalardy qorǵaýdyń túrli aspektilerine, atap aıtqanda, balalar men otbasylarǵa kómek kórsetý ınfraqurylymyna, turǵyn úımen qamtamasyz etý, zorlyq-zombylyq pen sýıtsıdtiń aldyn alý sharalaryn engizýge qatysty 7 zańǵa ózgerister men tolyqtyrýlar engizildi. Balalardyń quqyqtaryn qorǵaý júıesin jetildirý jumysy jalǵasyp jatyr.
«Adal azamat» birtutas tárbıe baǵdarlamasy qabyldanyp, iske asyrylyp jatyr. «Qazaqstan balalary» keshendi baǵdarlamasy múddeli memlekettik organdarmen kelisilip jatyr.
Buǵan qosa bala quqyqtaryn qorǵaý júıesin óńirlik deńgeıde odan ári nyǵaıtý isi jalǵasyp jatyr. Osy baǵytta bala quqyqtary jónindegi basqarmalar qurylyp, qorǵanshylyq uıymdarynyń shtaty ulǵaıýda.
Redjına De Domınıchıs Qazaqstannyń bala quqyqtaryn qorǵaý salasynda qabyldaǵan sharalaryn joǵary baǵalady. Sondaı-aq elimizdiń bul rette óńirge ǵana emes, Eýropanyń birqatar memleketine úlgi bolyp otyrǵanyn aıtty.
ıÝNISEF aımaqtyq dırektory Qazaqstannyń MICS-2024 baǵdarlamasyndaǵy (mýltıındıkatorlyq klasterlik zertteý) jekelegen baǵyttar boıynsha jaqsy nátıjege qol jetkizgenin eske saldy.
De Domınıchıs hanym balalardyń quqyqtaryn qorǵaý jónindegi naqty jumys tetikterine oń baǵa berip, elimizdiń tájirıbesin basqa memleketterge usynýǵa daıyn ekenin jetkizdi. Ol Qazaqstan Prezıdentiniń osy saladaǵy reformalary balalardy qorǵaý isine serpin ákelgenin atap ótti.
Kezdesý sońynda taraptar yntymaqtastyqty odan ári nyǵaıtýǵa jáne bolashaq urpaq múddesine saı birlesken bastamalardy júzege asyrýǵa nıetti ekenin rastady.
Aıta ketelik Memlekettik keńesshi Azamattyq máseleleri jónindegi komıssııanyń kezekti otyrysyn ótkizgen edi.