ıÝNISEF: Qazaqstanda oqýshylardyń 23 paıyzy álimjettikten zardap shegedi
ASTANA. QazAqparat - BUU Bala quqyǵy týraly konventsııasynyń Qazaqstanda ratıfıkatsııalanǵanyna 20 jyl toldy. 1 maýsym - balalardy qorǵaýdyń halyqaralyq kúni osyǵan oraı Astanada halyqaralyq konferentsııa ótti.
Bul týraly 24.kz jazady.
Qujatta balalar qoǵamnyń teń quqyly ókili ekendigi kórsetilgen. Alaıda anasynyń perzentin satyp, aqsha tappaq bolǵan nemese balanyń zorlyq-zombylyqtan zardap shekkendigin aıǵaqtaıtyn málimetter jeterlik. Mektep qabyrǵaǵasyndaǵy oqýshylardyń 66,3 paıyzy zorlyq-zombylyqtyń qurbany nemese kýási bolsa, 23 paıyzy álimjettikten zardap shegedi. Bul - ıÝNISEF-tiń adam quqyqtary jónindegi ulttyq ortalyqpen birlesip, Qazaqstannyń 7 qalasynda jasóspirimder arasynda júrgizgen zertteýleriniń nátıjesi.
Sondaı-aq, kóp jaǵdaıda qazaqstandyq oqýshylar synyptastary mazaq qylǵanyna namystanyp, óz-ózine qol jumsaýǵa deıin baratyndyǵy da anyqtalǵan.Bul oraıda psıhologtar «búgingi jastar bolmashy qıyndyqtarǵa bola kúńirenip, ómirden túńilýge daıyn turady» dep dabyl qaǵýda.
Juldyz Mahataeva, pedagog-psıholog: - Jasóspirimder qazirgi tańda óte ashýshań, agressııaǵa beıim. Sonymen depressııaǵa tez túsedi. Psıhodıagnostıkalyq jumysty kóp júrgizý kerek. Qyzylorda oblysynda jyl basynan beri eki, al ótken jyly 18 jasóspirim óz-ózine qol jumsaǵan. Sondaı-aq, osyndaı qadamǵa barmaq bolǵan 21 bala ólim aýzynan qaldy. Bul , sonymen qatar, Almaty, Ońtústik Qazaqstan oblystarynda da beleń alǵan ózekti másele.
Sonymen qatar, Májilistiń uıytqy bolýymen ótken halyqaralyq konferentsııada jabylyp jatqan balalar úıin daǵdarys ortalyǵyna aınaldyrý týraly usynys jasaldy.
Bul rette QR Parlament Májilisi tóraǵasynyń orynbasary Darıǵa Nazarbaeva: «Qazaqstandyq balalarǵa baqytty ómir syılap, olarǵa ýaıym-qaıǵynyń ne ekenin sezdirmes úshin kóptegen jumys jasaýymyz kerek. Balalar quqyǵyn qorǵaý boıynsha birqatar zańdy jetiltirgen jón. Sondaı-aq, múgedek balalarmen jumys jasaýda medıtsınalyq modelden áleýmettik úlgige kóshýimiz qajet. Búginde Qazaqstanda 130 myńnan astam múmkindigi shekteýli bala tirkelgen. Olardyń úshten bir bóligi ǵana tıisti bilim men qyzmetke qol jetkize alady. Sońǵy jyldary múgedek balalardy baýyryna basyp, olardy emdeýge qarjysyn aıamaıtyn qaıyrymdy jan sany kóbeıip keledi» dep atap ótti.
