Gazada atys toqtaǵanyna qaramastan, 300 bala kóz jumdy — ıÝNISEF
ASTANA. KAZINFORM — Byltyr qazan aıynda HAMAS pen Izraıl qorǵanys armııasy arasyndaǵy atysty toqtatý týraly kelisim kúshine engennen beri Gaza sektorynda keminde 300 bala qaza tapqan. Bul týraly BUU jańalyqtar qyzmeti habarlady.
Bul málimetti beısenbi kúni BUU-nyń Balalar qory (ıÝNISEF) jarııalady. Uıymnyń habarlaýynsha, búginde Gaza sektoryndaǵy otbasylar aýmaqtyń shamamen úshten bir bóligine ǵana syıyp, qıraǵan ǵımarattar men úıindilerdiń arasynda ómir súrýge májbúr.
— Kún saıyn bir bala qaza taýyp jatqanda, muny atysty toqtatý dep aıtý qıyn. Mundaı jaǵdaı Gaza balalarynyń úmitin aqtamaıdy, — dedi ıÝNISEF-tiń Taıaý Shyǵys pen Soltústik Afrıka boıynsha óńirlik dırektory Edýard Beıgbeder.
BUU ókili beıbit kelisimge qatysty júrgizilip jatqan kelissózderge toqtalyp, áskerı qaqtyǵysty toqtatýǵa jáne gýmanıtarlyq kómekti kóbeıtýge baǵyttalǵan keıingi málimdemelerdi quptady.
— Gaza balalary úshin eń mańyzdysy — qantógis toqtaı ma? Olarǵa qajetti kómek tolyq kólemde jete me? Aýrýhanalar qaıta jumys isteı me, taza aýyzsý berile me? Balalar qyrkúıekte mektepke qaýipsiz jaǵdaıda orala ala ma? — dedi Beıgbeder.
Onyń aıtýynsha, jasalǵan kelisimder sóz júzinde qalmaı, naqty iske asýy kerek.
ıÝNISEF málimetinshe, Gaza sektorynyń barlyq aýmaǵynda balalar áli de ashtyq pen túrli aýrýdan zardap shegip otyr. Sonymen qatar olar taza aýyzsý men qalypty jumys isteıtin káriz júıesiniń tapshylyǵyn kórip keledi.
HAMAS-tyń Izraılge shabýylynan keıin qaqtyǵys bastalǵaly beri BUU Gaza turǵyndaryna gýmanıtarlyq kómek kórsetip keledi.
Alaıda kómek kólemin arttyrýǵa qaramastan, ıÝNISEF mamandary medıtsınalyq ortalyqtarǵa jaǵdaıy aýyr, ashtyqtan álsiregen balalary bar analardyń áli de kóptep júginetinin aıtyp otyr.
Gýmanıtarlyq kómektiń tapshylyǵy merziminen buryn bosaný jaǵdaılary men densaýlyǵy óte aýyr nárestelerdiń kóbeıýine de áser etken.
— Inkýbatorlar jetispeıdi. Keıde dárigerler bir apparatqa eki, tipti úsh náresteni qatar ornalastyrýǵa májbúr bolyp jatady, — dedi ıÝNISEF ókili Lýıza Ýoterıdj.
Onyń aıtýynsha, sábıler medıtsınalyq jabdyqtar men dári-dármek jetispeıtin, tolyqqandy jumys istep turǵan joq aýrýhanalarda dúnıege kelip jatyr.
— Álem bul jaǵdaıdy atysty toqtatý dep ataıdy. Alaıda Gazadaǵy otbasylar áli de balalaryn jerlep jatyr, — dedi ıÝNISEF ókili.
BUU-nyń Gýmanıtarlyq máselelerdi úılestirý basqarmasy Gaza densaýlyq saqtaý organdaryna silteme jasap, 2025 jylǵy 10 qazanda atysty toqtatý jarııalanǵannan beri óńirde 1 209 adam qaza taýyp, 3 943 adam jaralanǵanyn habarlady.
Zorlyq-zombylyq áli de jalǵasyp jatqanyna qaramastan, BUU men onyń seriktesteri Gaza turǵyndaryna gýmanıtarlyq kómek kórsetýdi jalǵastyryp keledi. Qazir mektepke deıingi jáne mektep jasyndaǵy 250 myńnan astam bala jazǵy bilim berý baǵdarlamalaryna qatysyp jatyr. Bul sharalar balalarǵa qalypty ómirge degen senimin saqtaýǵa jáne soǵys kezinde jiberip alǵan biliminiń ornyn toltyrýǵa múmkindik beredi.
Eske salaıyq, buǵan deıin Izraıl áskeri Gaza sektorynyń barlyq aýmaǵynda palestınalyq beıbit turǵyndarǵa qarsy shabýyldaryn kúsheıtip, azamattyq halyq pen ınfraqurylym nysandaryna júıeli túrde soqqy jasap jatqanyn habarlaǵan edik.
