ıÝNISEF: Gazada 90%-dan asa mektep zaqymdanǵan nemese qıraǵan
ASTANA. KAZINFORM — Bala quqyqtary jónindegi BUU qory (ıÝNISEF) ókili Djeıms Elderdiń habarlaýynsha, Gaza sektoryndaǵy mektepterdiń 90%-dan astamy qıraǵan nemese zaqymdanǵan, dep habarlaıdy Anadoly.
Elder Jenevadaǵy BUU bólimshesiniń aptalyq brıfıngine vıdeobaılanys arqyly qatysyp, osy málimetterdi jarııa etti.
ıÝNISEF ókili atap ótkendeı, Gaza sektoryndaǵy mektepterge baǵyttalǵan shabýyldar eki jarym jylǵa jýyq ýaqyt boıy bir býyn balalardyń bolashaǵyn qaýipke tikti.
— Gazada mektep jasyndaǵy balalardyń 60%-y qazir dástúrli oqý protsesine qatysa almaıdy. Mektepterdiń 90%-dan astamy zaqymdanǵan nemese qıraǵan. 5 jasqa deıingi 335 myńnan astam bala erte damý qyzmetteri júıesiniń buzylýynan aýyr damýdaǵy táýekelge ushyrap otyr, — dedi Elder.
Onyń aıtýynsha, 2023 jylǵy qazanǵa deıin Gazadaǵy palestınalyqtar álemdegi eń joǵary saýattylyq deńgeıleriniń birine ıe bolǵan, alaıda bul jetistik qazir qaýip astynda.
Gazadaǵy jyldar boıǵy progress joıyldy
— Gazada mektepter, ýnıversıtetter jáne kitaphanalar buzylǵan, al jyldar boıǵy progress joıyldy. Bul tek fızıkalyq zaqym emes — bul tikeleı bolashaqqa soqqy. Osy aıaýsyz soǵystan keıin mektepterdi, oqý oryndaryn jáne ýnıversıtetterdi qalpyna keltirý Gazadaǵy qalpyna keltirý josparynyń basty basymdyqtarynyń biri bolýy tıis, — dedi Elder.
Ol ıÝNISEF Palestına ákimshiligi jáne basqa seriktestermen birlesip, barlyq balany múmkindiginshe tezirek oqýǵa qaıta tartý úshin jumys istep jatqanyn habarlady. Qazirgi ýaqytta ıÝNISEF Gaza sektorynda 100-den astam bilim berý ortalyqtaryna qoldaý kórsetip jatyr.
Elder Gaza halqynyń jartysyna jýyǵy 18 jasqa deıingi balalar ekenin aıtty.
— ıÝNISEF oqý ortalyǵynda bir balany ornalastyrýdyń jyldyq quny, psıhologııalyq qoldaýdy qosa alǵanda, shamamen 280 dollar. Mektep jasyndaǵy 336 myń balany aǵymdaǵy jyldyń sońyna deıin qamtý úshin ıÝNISEF-ke shuǵyl túrde 86 mln dollar qajet, — dedi ol.
«Anadoly» agenttiginiń Rafah baqylaý beketiniń qazirgi jaǵdaıy týraly suraǵyna Elder uıym palestınalyqtarmen baılanysta ekenin jáne olar ótkeldiń ashylýyn qatty kútip otyrǵanyn aıtty.
— Qazirgi ýaqytta eń qarapaıym jaýap — joq, Rafah shekaralyq ótkeli áli ashylmady. Alaıda toqtatý rejıminiń ekinshi kezeńi boıynsha ony ashpaýǵa eshqandaı sebep qalmaýy tıis, — dedi Elder.
Budan buryn habarlanǵandaı, qys maýsymynyń basynan bastap, Izraıl janarmaı men gýmanıtarlyq kómek jetkizilýine kedergi jasap otyrǵan Gaza sektorynda sýyqtan 10 bala kóz jumdy.