ıÝNESKO Taıaý Shyǵystaǵy mádenı mura nysandaryna keltirilgen zalaldy baǵalap jatyr
ASTANA. KAZINFORM — ıÝNESKO Iran, Lıvan jáne Izraıl aýmaǵyndaǵy mádenı-tarıhı nysandarǵa keltirilgen zalaldy baǵalap jatyr. AQSh pen Izraıldiń Iranǵa jasaǵan soqqylary saldarynan keminde tórt mádenı-tarıhı nysan zaqymdanǵan, dep habarlaıdy AZERTADJ.
Agenttiktiń habarlaýynsha, qıraýlardyń jyldamdyǵy men aýqymy Iran men Lıvan bıligin alańdatyp, olar ıÝNESKO-ǵa qosymsha nysandardy erekshe qorǵaýǵa alynatyn obektiler tizimine engizý jóninde ótinish joldaǵan.
ıÝNESKO Golestan saraıy kesheniniń zaqymdanǵanyn rastady. Bul saraı Qadjarlar dáýirine jatady jáne Tegeran qalasynda ornalasqan. Sondaı-aq XVII ǵasyrdaǵy Chehel‑Sotýn saraıy men Isfahandaǵy Masdjıd‑Djame meshiti de zaqymdanǵan.
Budan bólek, Horramabad ańǵary mańyndaǵy ǵımarattarǵa da zııan kelgen. Onyń ishinde b.z.d. shamamen 63 myń jyl buryn adamdar ómir súrgenin dáleldeıtin bes ejelgi úńgir men bir jartastaǵy baspana bar.
Qaqtyǵystyń saldary Taıaý Shyǵystyń basqa aımaqtaryna da áser etip jatyr. ıÝNESKO Aq qala (Izraıl) men Tır qalasy (Lıvan) sııaqty nysandarǵa keltirilgen zalaldy da baqylap otyr.
Birikken Ulttar Uıymy Bas hatshysynyń resmı ókili Stefan Dıýjarrıktiń aıtýynsha, qaqtyǵystar kezinde tek beıbit turǵyndar ǵana emes, azamattyq ınfraqurylym men adamzattyń baǵa jetpes tarıhı murasy da zardap shegedi.
Al Human Rights Watch uıymynyń sarapshysy Bonnı Dochertı mádenı mura nysandarynyń búlinýi jergilikti qoǵamdastyqtyń tarıhı jadyn álsiretip, adamdardy biriktiretin ortaq qundylyqtarǵa nuqsan keltiretinin atap ótti.
Budan buryn Izraıl Irannyń joǵarǵy kóshbasshysy paıdalanǵan ushaqty joıǵanyn málimdedi.
