ıÝan kóp paıdalanylatyn álem valıýtalarynyń bestiginen shyǵyp qaldy
ASTANA. QazAqparat - 2015 jylǵy aqpannyń qorytyndysymen ıýan álemdegi qarjylyq esep-qısapta kóbirek paıdalanylatyn valıýtalardyń bestiginen shyǵyp qaldy, dep habarlady The Wall Street Journal basylymy, Búkilálemdik bankaralyq qarjylyq telekommýnıkatsııalar qoǵamdastyǵynyń (SWIFT) málimetterine silteme jasap.
Sóıtip, ıýan top-5-te nebári úsh aı turaqtady - 2014 jylǵy qarashada qytaı valıýtasy jetinshi orynnan besinshi orynǵa joǵarylap, kanadalyq jáne avstralııalyq dollardy basyp ozǵan bolatyn, dep habarlady RBK. Qystyń kóp bóliginde ıýan álemdik esep-qısapta AQSh dollaryna, eýroǵa, brıtan fýnt sterlıngisine jáne japon ıenine ǵana jol berdi. 2014 jyly jeltoqsanda ol barynsha kóterilip 2,17 paıyz mejege jetti, sonyń nátıjesinde ıenniń artyqshylyǵy 0,5 paıyzdyq tarmaqqa deıin qysqardy.
Qańtarda ıýan 2,06 paıyzǵa deıin qysqardy, biraq ta oǵan qaramastan QHR valıýtasy top-5-te qaldy, al qujattamalyq akkredıtıvter boıynsha esep-qısapta onyń úlesi shırek kólemge deıin ósip (7,32 paıyzdan 9,43 paıyzǵa deıin) sonyń nátıjesinde ıýan ekinshi orynǵa ornyǵyp, eýrodan edáýir uzap ketti.
2015 jylǵy aqpannyń qorytyndysynda ıýan úlesi 1,81 paıyzǵa deıin qysqaryp, valıýtalardyń halyqaralyq esep-qısabynda eń kóp qoldanylatyn valıýtalardyń reıtıngisinde qaıtadan jetinshi orynǵa shegindi.
Onyń bulaısha quldyraýyn SWIFT sarapshylary uzaqqa sozylǵan qytaılyq jańa jyl merekesinen kóredi. Qytaıda ony atap ótý 19 aqpanda bastaldy jáne bul birqatar jergilikti bankter men qarjy kompanııalarynyń birneshe jumys kúnderi boıy kanıkýlge ketýine ákep soqty.
2015 jylǵy naýryzda QHR Ortalyq bankiniń basshysy Chjoý Sıaochýan deflıatsııa qaýpin eskertip, eger el shamadan tys jumsaq nesıe-aqsha saıasatyn júrgizetin bolsa, Qytaıdyń qurylymdyq reformalary paıda bermeıtinin aıtqan bolatyn.
