Ystyqta densaýlyqty qalaı saqtaý kerek - dáriger keńesi
ALMATY. QazAqparat – Sınoptıkter osy aptada Qazaqstannyń ońtústiginde aýa temperatýrasy qyryq gradýsqa deıin kóteriletinin aıtqan bolatyn. Osyǵan baılanysty almatylyq dáriger birqatar keńes berdi, dep habarlaıdy QazAqparat tilshisi.
Ortalyq klınıkalyq aýrýhananyń jalpy tájir ı belik dárigeri Arına Kırdıaıkınanyń aıtýynsha, aptap ystyq ásirese, gıpertonıkter, egde jastaǵy adamdar men balalar úshin óte qaýipti.
«Kúnniń ystyǵynan eresek adamdardyń qan qysymy kóteriledi, krızder, ınsýltter jıileıdi, balalarǵa kún ótedi, bas aýyrady, loqsý, qusý, tipti talyp qalý jaǵdaılary da kezdesedi. Sondyqtan kún qatty ysyǵan kezde túski saǵat 12:00-den keshki saǵat 17:00-ge deıin serýenge shyqpaǵan jón, kúnnen qorǵaıtyn bas kıim kıińizder, qolshatyr ustańyzdar»,- deıdi maman.
Sonymen qatar, dáriger aǵzada sýsyzdanýdy boldyrmaý úshin suıyqtyqty jetkilikti mólsherde ishý kerektigin atap ótti.
«Sonymen birge, bólme temperatýrasyndaǵy sýdy ishýge keńes beremin. Sebebi, qatty sýyq sý shóldi qandyrmaıdy jáne tamaq aýrýyn týǵyzýy múmkin. Deni saý adamdarda sýdyń kólemi táýligine úsh lıtrden aspaýy tıis, basqalarda ekiden aspaýy kerek. Fızıkalyq júktemeni shekteý qajet, óıtkeni aǵza onsyz da artyq salmaq kóterip tur, ter qatty bólinedi, jıi dýsh qabyldaýdy, shomylýdy umytpańyzdar»,- dedi dáriger.
Qazgıdromettiń 19 shildege arnalǵan aýa raıy boljamy boıynsha, Almaty qalasynda kóshpeli bult shyǵady. Aýanyń temperatýrasy túnde 19-21, kúndiz 30-32 gradýs ystyq bolady.
