Ystyqkólde sý attraktsıony apatqa ushyrap, 2 adam qaza tapty
BІShKEK. KABAR-QazAqparat – Ystyqkólde «Tabletka» sý attraktsıonynda demalýshylar teplohodqa soǵylyp, qyz ben jigit qaza tapty, dep habarlaıdy QazAqparat «Kabarǵa» silteme jasap.
Óńirlik ІІB baspasóz qyzmetiniń málimetinshe, oqys oqıǵa týraly úsh zardap shegýshi túsken aýrýhanadan habarlanǵan.
23 shilde kúni saǵat 16:30-da Sholpan-Atadaǵy jaǵajaılardyń birinde motorly kater «Tabletka» sý attraktsıony qyzmetin kórsetip, demalýshylardy qydyrtqan. Týrıster otyrǵan ballon teplohodqa soǵylady.
Oqıǵada úsh adam zardap shekti, onyń ekeýi qyz ben jigit sol kúni jansaqtaý bóliminde qaza tapty. Taǵy bir zardap shegýshi hırýrgııa bóliminde em alyp jatyr.
Mılıtsııa kúdiktini ustady, ol tergeý kezinde kinásin moıyndady.
Qazirgi ýaqytta sot-medıtsınalyq saraptamasy taǵaıyndaldy, sotqa deıingi tergeý júrip jatyr.
Buǵan deıin Sholpan-Ata qalasynda Ystyqkól jaǵajaıynda gıdrotsıkl (sý skýteri) eki adamdy qaǵyp, mert qylǵany týraly habarlaǵan edik.
