Ystyqkólde kókbóriden álem kýbogynda qazaq komandasy ekinshi oryn aldy

ASTANA. QazAqparat – Kókbóriden (joǵarǵy lıga) І álem kýbogynyń jeńimpazy Qyrǵyzstannyń «Yntymaq»komandasy boldy, dep habarlaıdy QazAqparat Kabar aqparat agenttigine silteme jasap.

Olar fınalda qazaqstandyq «Astana» komandasymen kezdesti. Qos komandanyń kezdesýi 10:1 esebimen aıaqtaldy.

Osylaısha, «Yntymaq» komandasyna altyn medaldar men 2 mln somǵa sertıfıkat, «Astana» komandasyna kúmis medal men 2 mln somǵa sertıfıkat tabystaldy.

Al úshinshi oryn alǵan «Dostyq» komandasy 800 myń som jeńip aldy.

Aıta keteıik, birinshi lıgada jeńimpaz atanǵan Qyrǵyzstannyń «Jashtyq» komandasynyń aqshalaı júldesi 2 mln som boldy.

Birinshi lıga jeńimpazdarynyń tizimi:

- birinshi oryn: «Jashtyk» (Qyrǵyzstan) - 2 mln som;

- ekinshi oryn «Krasnoıarsk» (Reseı) - 1 mln som;

- úshinshi oryn «Ózbekstan» (Ózbekstan) - 500 myń som;

- tórtinshi oryn «Altaı» (Reseı) - 250 myń som.

45 jastan asqan qatysýshylar arasynda ótken jarysta birinshi oryndy Qyrǵyzstannan kelgen komanda (600 myń som), ekinshi oryndy «Qazaqstan» komandasy (400 myń som) ıelendi.

Eske sala keteıik, kókbóriden halyqaralyq týrnır 13 tamyzda bastalǵan. Onyń ashylý saltanatyna Qyrǵyzstan prezıdenti Sadyr Japarov qatysty.

Kókbóri (kókpar) – qazaq, qyrǵyz, altaı, bashqurt, ózbek jáne basqa da Azııa halyqtary arasynda tanymal at sporty oıyny. Oıynshylar at ústinde serkege talasady.

Ony qarsylastaryna aldyryp qoımaı, qarsy komandanyń taıqazanyna tastaýy kerek.

Bıyl jarysqa jańa ereje engizilip, oıyndaǵy tóreshi sany beske deıin kóbeıdi.

Bir taımnyń uzaqtyǵy 15 mınýtqa qysqardy (buryn 20 mınýt bolatyn). Serke taıqazanǵa túskennen keıin oıynshy at ústinde alańda bolýy kerek.