Ystyqkólde Qazaqstan azamatynyń ólimine kináli qylmysker 16 jylǵa sottaldy
ASTANA. 6 jeltoqsan. QazAqparat (Rýslan Ǵabbasov) - Ystyqkólde soqqyǵa jyǵylyp, qaza bolǵan Qazaqstan azamatynyń ólimine kinálilerge qatysty sot úkimi shyǵaryldy.
Bul týraly búgin Astanada ótken brıfıngte QR Syrtqy ister mınıstrliginiń resmı ókili Altaı Ábıbýllaev málim etti. Esterińizge sala keteıik, bıyl Ystyqkól oblysynda soqqyǵa jyǵylyp, 14 tamyzda Bishkektiń Ulttyq aýrýhanasynda Qazaqstan azamaty Erlan Balmahaev qaıtys bolǵan edi. Atalǵan qylmystyq is boıynsha Sholpan Ata qalasynda 23 qarashada jáne 1 jeltoqsanda sot otyrysy ótti. «Sońǵy sot otyrysynyń nátıjesi boıynsha, Bishkek qalasynyń turǵyny, 1991 jyly týǵan Qaırat Nurlanuly 16 jylǵa bas bostandyǵynan aıyryldy», dedi resmı ókil. Sonymen qatar, Qubat Muratuly 5 jyl shartty jazaǵa, Tilek Talaıbekuly 3 jylǵa shartty jazaǵa kesildi. Al 1996 jyly týǵan Naýryzbek Nurbekuly sot sheshimimen aqtalyp shyqty. «Alaıda, Balmahaevtyń advokattary men týystary aıyptalýshy Qubat Muratulyn da keminde bas bostandyǵynan 10-15 jylǵa aıyryp, kúsheıtilgen rejımdi túrmege otyrǵyzý maqsatynda bıylǵy 7 jeltoqsanda Sholpan Ata qalalyq sotyna apellıatsııalyq shaǵym berýdi josparlap otyr», dedi SІM resmı ókili.
