Ystanbuldan 300 qazaqstandyq otanyna orala almaı otyr
ASTANA. QazAqparat - Ystanbuldan Qazaqstannyń 300 azamaty otanyna orala almaı otyr. Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Ystanbul áýejaıyndaǵy ahýal barynsha kúrdeli. Ol qazirde jalǵasýda. Qalyń qardyń jaýýy saldarynan túrik áýe jelisiniń myńdaǵan reısi barlyq baǵytta, onyń ishinde aǵymdaǵy jyldyń 6, 7, 8, 9 qańtar kúnderi Ystanbul-Almaty-Ystanbul, Ystanbul-Astana-Ystanbul baǵytynda da reısi keıinge shegerilgen. Keshe «Eır Astana» áýe kompanııasynyń reısi de keıinge shegerildi. Búginde Turkish Airlines Qazaqstan baǵytyndaǵy 2 reısin keıinge shegeredi dep kútýdemiz», - dedi Qasymbek.
Mınıstr derekterine sáıkes, sonyń saldarynan 900 adam zardap shekken.
«Onyń ishinde biz 600 adamdy aýa raıy qolaıly bolǵanda elge jetkizdik. 300 adam búginde Ystanbul áýejaıynda qalyp otyr. Olar qonaq úımen jáne tamaqpen qamtamasyz etilgen», - dedi ol.
Onyń sózine qaraǵanda, aldaǵy ýaqytta da aýa raıynyń beti kóńil kónshiterlik emes, qalyń qar jaýatyndyǵy kútilýde.
«Biz ahýaldy baqylaýda ustaýdamyz. Túrik avıatsııalyq bıligimen jáne áýe kompanııalarymen belsendi jumys isteýdemiz», - dedi mınıstr.
Onyń sózine qaraǵanda, Taılandqa qatysty da ahýaldyń mán-jaıy anyqtalý ústinde.
«Reıster keıinge shegeriletindigi boljanǵan bolatyn. Taılandtyń ishki reısteri qarqyndy ózgeriske ushyraýda. Biraq, Qazaqstan baǵytyndaǵy reıster búgingi kúni keste boıynsha oryndalýda», - dedi Jeńis Qasymbek.
